Ерөнхий сайд сүүлийн үед мэдээллийн хэрэгслээр гарч буй улсын баяр наадамд 50 тэрбум төгрөг зарцуулах гэж байгаа тухай мэдээлэл ор үндэсгүй хэмээн чуулганы нэгдсэн хуралдаан дээр мэдээлэл хийх үеэрээ тодотгов. Энэ жилийн баяр наадмын төсөв 1.6-1.7 тэрбумаас хэтрэхгүй гэж тэрбээр хэлсэн юм. Нийслэлийн төсвөөс баяр наадамд зориулан 380 сая төгрөгийг зарцуулах бол тасалбар, бусад зөвшөөрлийн орлогоос 400 саяыг олно хэмээн тооцоолсон байна. Үлдэх 700-800 сая төгрөгийг Засгийн газрын нөөцөөс гаргах ажээ. Нийслэлийн Засаг даргын Тамгын газраас Хүй долоон худгийг ойрын 4-5 жилд өөрчлөх төлөвлөгөөг гаргаад энэ ажилд 50 тэрбум орчим төгрөг зарцуулах тооцоо гаргасныг энэ жилийн наадмын төсөв мэтээр ойлгосон байна гэж Ерөнхий сайд залруулсан юм. Энэ жилийн хувьд Хүй долоон худгийн автозамын түгжрэлийг багасгах зорилгоор нийтдээ 8 км зам барих юм байна. Түүнчлэн тэнд Сүхбаатарын талбайгаас хоёр дахин том талбайг цардан бэлтгэж, тэрхүү газарт хоолны үйлчилгээ, арилжаа наймаа явагдах ажээ. Мөн хурдан морины уралдаан сонирхогчдод зориулан 4000 машины зогсоол байгуулах юм байна. Үзэгчдийн суудал, бие засах газар байгуулан, хогийн сав тавих, явган хүний зам барих зэрэгт нийтдээ 14.6 тэрбум төгрөгийн хөрөнгө оруулалт хийгдэх ажээ.

Зарим гишүүд баяр наадмаар зарцуулах төсвийн талаар тодруулж байв. Өнгөрсөн жил 44 сая төгрөгөөр хийсэн баяр наадмын нээлтийн ажиллагааг энэ жил хэдээр хийх гэж байгаа, 28 сая төгрөгөөр зохион байгуулсан хүндэтгэлийн тоглолтын зардал хэд болж өссөн, 5 сая төгрөгөөр хийж байсан Улаанбаатарын үдэш цэнгүүний зардал хэд болов хэмээн лавлаж байлаа. Шадар сайд Д.Тэрбишдагва хариулснаар, хүндэтгэлийн тоглолтын зардал 35 сая болж өссөн бол 5 сая төгрөгөөр хийж байсан Улаанбаатарын үдэш цэнгүүний зардал хэвээрээ байгаа аж. Өнгөрсөн жил 44 сая төгрөгөөр хийсэн баяр наадмын нээлтийн ажиллагаа ард иргэдэд төдийлөн таалагдаагүй учир энэ жил чанартай арга хэмжээг зохион байгуулах үүднээс салбар комиссын саналыг үндэслэн 150 сая төгрөгөөр тогтоосон гэж тэрбээр тайлбарласан. Наадмын талбайн эргэн тойронд машин тавих зай талбай бага учир энэ жил “Дүнжингарав” худалдааны төвийн зогсоолд иргэдийн машиныг тавиулаад тэднээс наадмын талбай хүртэл автобусаар зогсолтгүй үнэ төлбөргүй үйлчлэх болсон талаар ч Шадар сайд дуулгалаа.