Нийслэлийн авто замын түгжрэлийг бууруулах зорилгоор “Гудамж” төслийн хүрээнд дөрвөн замын уулзваруудын шинээр бий болгож буй. Энэ төслийн эхний ажил болох “Өргөө” театрын зуун урд талд дөрвөн замын уулзварыг хийж, өчигдөр нээлтээ хийсэн юм. Уг замыг өдрийн 13.00 цагийн орчим нээсэн бөгөөд 15.00 цагийн үед очиход замын ачаалал өндөр байлаа. Гэрэл дохионы тохиргоо бүрэн хийгдээгүй, салгаж нийлүүлж, эсвэл зэрэг гэрлүүдээ анивчуулсан нь жолооч, зорчигчдыг багагүй бухимдуулж байсан.

Тиймээс Замын цагдаа нар хөдөлгөөнийг зохицуулахаар дохиход зарим нэг жолооч нар гэрэл дохиогоор хөдөлгөөнд оролцуулсангүй хэмээн бухимдаж, зорчигч нар явган хүний гэрэл асаад байхад явуулсангүй хэмээн дургүйцлээ илэрхийлж байгаа нь харагдсан.

Уг замын хөдөлгөөнийг Баянгол дүүргийн Замын цагдаагийн тасгийн ажилтнууд зохицуулж байсан ба тэд хэлэхдээ “Шинэ хөдөлгөөний урсгал гэдэг утгаараа жолооч зорчигч нарт дасахад багагүй хугацаа шаардагдаж байна. Гэрэл дохионы тохиргоо хийгдэж байгаа тул унтарч, асан хөдөлгөөнд оролцогчдийг төөрөгдүүлж байна. Гэхдээ жолооч нар энэ түр зуурын асуудлыг үл тоон бухимдаж, тэвчээргүй түрэмгий хөдөлгөөнд оролцох юм. Уг нь Замын хөдөлгөөний дүрмээр гэрэл дохиотой байсан ч зохицуулагчийн удирдлагаар хөдөлгөөн үргэлжилдэг гэдгийг мартсан бололтой. Удахгүй гэрэл дохио жигдрэхээр зүгээр болчих байх аа” гэж байв.

“Гудамж” төслийн хүрээнд энэ онд хотын төвд хэд хэдэн уулзвар шинээр бий болно. Энэ сарын 15-нд гэхэд Саппорогийн аюулгүйн тойрог ашиглалтад орох юм. Тиймээс Улаанбаатар хотын замын хөдөлгөөний удирдлагын төвийнхөн хөдөлгөөн эхлэхээс өмнө гэрэл дохиогоо тохируулж байвал жолооч зорчигч, замын цагдааг бухимдуулсан асуудал гарахгүй бизээ.

П.Наран