Хүн метр гаруй марль залгина гэж юу байх вэ ?

6

III төрөх эмнэлгийн эмч нар хариуцлага алдсанаас 31 настай Э.Хонгорзул бүсгүй жил гаруйн хугацаанд хэвлийдээ марльтай явснаас нарийн гэдэс үгжирч муудан, бие нь муудсан тухай хэвлэлүүд бичиж байв. Энэ асуудалд одоогоос хэдхэн сарын өмнө холбогдох албаныхан мэдээлэл хийж, “Э.Хонгорзулын хэвлийгээс нь марль гарлаа. Үүнд буруутай эмч нарыг ажлаас нь халлаа” гэж байсан.

Тэр ч бүү хэл, Эрүүл мэндийн дэд сайд Ж.Амарсанаа өөрийн твиттер хуудаснаа “Бид Э.Хонгорзулыг дөнгөж сая эргэлээ. Манай салбарын буруутай үйлдлээс болсон байна” хэмээн жиргэж, багагүй шоудсан.

6

6

Гэтэл одоо болохоор “Э.Хонгорзул марль залгисан байх магадлалтай” гэсэн дүгнэлт гаргасан байх юм. Тодруулбал, өнгөрсөн тавдугаар сарын 31-нд Шүүх шинжилгээний үндэсний хүрээлэн /ШШҮХ/-гийн Шүүх эмнэлгийн шинжилгээний хэлтэс /ШЭШХ/-ийн ахлах зэргийн шинжээч эмч Ц.Ганболд, Ж.Ганцэнгэл, С.Чулуунсүх нар  хавтаст хэргийн материалаар шинжилгээ хийж дүгнэлт үйлджээ. Улмаар дүгнэлтэд үндэслэн хэргийг нь хэрэгсэхгүй болгох санал прокурорт хүргэж буйгаа Э.Хонгорзулд дуулгасан байна. Шүүх эмнэлгийн гаргасан уг дүгнэлтэд хохирогч Э.Хонгорзулын ар гэрийнхэн нь гомдолтой байгаагаа илэрхийлж, өчигдөр манай сайтад хандсан юм. Гомдлын мөрөөр манай сурвалжлах баг Шар хадны эцэст амьдрах Э.Хонгорзулынд очлоо. Биднийг очиход өвчиндөө шаналсан Э.Хонгорзул дусал залгуулан хэвтэж байлаа. Харин түүний ээж Г.Нарантуяа “Хүн метр гаруй марль залгина гэж юу байхав дээ, хүү минь” гэсээр бидэнтэй цөөн хором ярилцлаа.

6

-Э.Хонгорзулын биеийн байдал ямар байна?

-Охины маань бие тааруухан байгаа.  Сая долоо хоног эмнэлэгт хэвтээд гарч ирсэн.  Дусал тариагаар л аргацааж байна. Идэж уусан зүйлээ гэдсээрээ буцааж гаргаад, хэцүүхэн л байна даа.

5

-Шүүх эмнэлгийн дүгнэлт Э.Хонгорзулыг өөрөө марль залгисан гэсэн гэж байна. Дүгнэлт хэзээ гарсан бэ?

-Шүүх эмнэлгийн дүгнэлт өнгөрсөн 5-р сарын 31-нд гарсан. Э.Хонгорзулыг өөрөө марль залгисан байна гэсэн дүгнэлт гарсан. Тэгээд тэр эмч нарын хийсэн хэргийг хэрэгсэхгүй болгож байгаа юм байлгүй.  Өнгөрсөн гуравдугаар сард гарсан шүүх эмнэлгийн дүгнэлтээр хөдөлмөрийн чадвараа алдсан, 70 хувийн хүндрэлтэй байна гэж гарч байсан юм.  Тэгээд энэ хоёр гарсан шийдвэрийг хамтад нь авахаар БЗД-ийн цагдаагийн хэлтсийн байцаагч н.Энхзаяа дээр очиход “тэр дүгнэлт чинь байхгүй” гэсэн. Учрыг нь олохгүй байна.

6

-Та нар Эрүүл мэндийн сайд Н.Удвалд хандсан уу. Ямар нэг арга хэмжээ авна гэж байна уу?

-Эрүүл мэндийн сайд Н.Удвал дээр өргөдлөө бичээд орсон. Зун болж байгаа болохоор охиноо аваад сувилалд явмаар байна. Өдөр болгон дусал тариа хийж орондоо хэвтэж өнжихөөр хэцүү юм гэдгээ хэлсэн. Тэгсэн өргөдлөө бичээд бичиг хэрэг дээр орхичих би цохоод өгнө. Тэгээд 1-р эмнэлэгт хэвтүүлээд өгье гэсэн. Гэвч өргөдлөө өгснөө хойш сар гаруй болж байна.

6

-Тэгээд асуудлыг шийдэж өгсөн үү?

- Н.Удвал сайд өөрөө дэд сайдаа бидний өргөдлийг өгсөн байсан. Тэгээд Ж.Амарсанаа дээр ороход охин чинь 1-р эмнэлэгт хэвтэх ямар ч шаардлага байхгүй юм байна. Дүүргийнхээ эмнэлэгт хэвт гэсэн. Дүүргийн эмнэлэгт хэвтье гэхээр олон хүнтэй,  дараалал ихтэй. Төлбөргүй болохоор хүн ихтэй байдаг. Хоол цай нь холдоод татаад байдаг болохоор гэртээ гараад ирсэн байна.  Одоо хаана хандахаа мэдэхгүй байна.  Ядуу бидэнд эмнэлэг хуулийн байгууллага үйлчилдэггүй бололтой.  Хүн метр гаруй марль залгина гэж юу байхав дээ” гэв.

6

Биднийг ийн ярилцаж байх хооронд дуслаа залгуулж дуусчээ. Тэрбээр “Надад гурван хүүхдээ орхиод, марль залгиж амиа хорлох шалтгаан байхгүй. Ажил, мөнгө гээд дутагдсан зүйл нэг ч байгаагүй. Би сайхан ханьтай, одоо ч дэргэд маань үргэлж намайг асарч байна” хэмээн нүдэндээ нулимстай өгүүлэв. Уг нь өмнөхөө бодвол гэр дотроо босч алхахтайгаа болжээ. Гэвч гэдсээр нь өтгөн шингэн нь гардаг өнөө л хэвээр байв. Үргэлж уут зүүлттэй байдаг бөгөөд идсэн хоол, уусан унд нь боловсорч гүйцэлгүй шууд урсаад гардаг нь улам л дордуудж байгаа аж. Тэрээр эмнэлгээс эмнэлэг дамжин эмчлүүлж, мөн “Хэвлэлийнхэн анхаарлаа хандуулснаас хойш ЭМЯ-наас хааяа нэг асуудаг болсон байна, тиймээс би удахгүй эдгэрнэ” хэмээн итгэж, тэмцэж явсан нь салхинд хийсэх шиг алга болсон гэнэ. Өөрөөр хэлбэл, шүүх эмнэлгийн дүгнэлтийг сонсоод амьдрах хүсэл нь буурч “Энэ улсад би хэрэггүй юм байна. Хэн ч үнэн зөвөөр нь шийдвэрлэсэнгүй, тиймээс үхсэн ч яахав” гээд бухимдаж, бухимдахдаа унаж, татаж байгаа аж. Ээжийнх нь хэлснээр мөрдөн байцаагч Л.Эрхзаяа ням гаригийн 22.00 цагийн үед гэрт нь ирээд Э.Хонгорзулд хандан шагнал, урамшуулал гардуулах, эсвэл баярт мэдээ дуулгах гэж буй мэт байснаа “Шүүх эмнэлгийн дүгнэлтээр таныг марль залгисан байх магадлалтай гэж гарсан. Тиймээс би энэ хэргийг хэрэгсэхгүй болгохоор прокурорт хүргүүлэх гэж байна. Харин та танилцаад гарын үсгээ зурна уу” хэмээн шууд л хэлсэн юм байх. Энэ үгийг нь сонсуутаа л Э.Хонгорзул хямралд орж “Би үхье, шүүх цагдаад итгэж явсан чинь худлаа байж. Чи үдэш болсон хойно ирээд надад ийм зүйл сонсгохоосоо ичихгүй байна уу” хэмээн уйлж, үсээ зулгааж, ухаан санаа нь самуурсан байна.

6

Надад гурван хүүхдээ орхиод амиа хорлох галтгаан байхгүй

 6

-Шүүх эмнэлгийн дүгнэлт “Марль залгисан байх магадлалтай” гэж гарсан байна. Та одоо яая гэж бодож байна?

-Марль залгисан гэж дүгнэж байгаа юм бол намайг “Амиа хорлох гэж байжээ” гэсэн үг биз дээ. Надад гурван хүүхдээ орхиод амиа хорлох шалтгаан байхгүй. Нөхөртэйгөө хамт зах дээр наймаа хийдэг байсан. Би аз жаргал, хань ижлийн халамжаар дутаагүй, мөнгөтэй ч байлаа. Тийм болохоор амиа хорлох гэж марль залгихгүй биз дээ. Тэгээд ч хагалгаагаар охиноо төрүүлснээс хойш бие муудаж хэвтэрт ороод 1.3 жил болсон. Үнэхээр марль залгисан бол ингэж их удалгүй л түгжрээд үхэх байсан биз. Гэтэл өнөөдөр намайг өөрөө зориуд залгисан болгож байгаад нь би харамсч, маш их гомдож байна. Хагалгаанд орж марлийг нь авахуулахаас өмнө эмнэлэгт хүргэгдэж очоод онош тогтоогдолгүй явсаар эргээд л гэртээ ирдэг байсан. Тухайн үед ходоодоо хүртэл дурандуулахад шархгүй, эрүүл гэсэн дүгнэлт гарч байсан шүү дээ. Үнэхээр би өөрөө залгисан байсан бол ходоод шархалсан, эсвэл марль байх ёстой. Харин сүүлд эмнэлгийнхэн түгжрэл үүссэн байна гэсэн. Тэгээд л Одоо бол хурдхан шиг л дараагийнхаа хагалгааг хийлгээд босвол гурван хоёр дээрээ л очихыг хүсч байна.

6

-Одоо ямар хагалгаа хийлгэх билээ?

-Нарийн гэдэс залгах хагалгаанд орох ёстой. Хагалгаа хийлгээд хурдхан шиг босохсон гэж бодож байгаа ч үнэн хэрэгтээ эмнэлэгт итгэхгүй байна. Уг нь нэгдүгээр эмнэлгийн эмчилгээ сайн байдаг. Тэнд хэвтэхээр л эрс сайжирч байгаа нь мэдрэгддэг. Харин дүүргийн эмнэлгийн эмчилгээ, сувилгаа муу. Өдөр бүр хоёр шингэн залгуулж байж алдагдсан шингэн болон тамир нөхдөг юм. Гэтэл дүүргийн эмнэлэгт хэвтэхээр өдөрт нэгийг л залгадаг. Мөн эмнэлэгт хоол унд багатайгаас болж их өлсдөг. Тиймээс ээж, нөхөр хоёр маань өдөр шөнөгүй ээлжээр унд таслахгүй зөөх шаардлагатай болдог юм. Нэгэнт л эмчилгээ муу эмнэлэгт хэвтэж энэ хоёрыгоо зовоож байхаар гэртээ л байвал хамаагүй дээр юм байна. Одоо эмнэлэгт хэвтвэл 1-р эмнэлэгт л хэвтмээр байна. Даанч “ор байхгүй” гээд хүлээж авахгүй байгаа. Их л олон сар боллоо, ор нь сулардаггүй л юм байлгүй. Миний сэтгэлийн зовлонг эмнэлэг, шүүхийнхэн мэдэхгүй байна. Бие маань эдгэрчихвэл гурван хүүхэдтэйгээ гадуур баяр хөөртэй алхахсан, намайг асарсан ханийгаа, ээжийгээ, бусад хүмүүсийг баярлуулах сан гэж боддог /уйлав/. Заримдаа би босчихоод гадуур явж тийм ажил хийнэ, тэгнэ, ингэнэ гээд л мөрөөддөг болсон. Үнэхээр би зовж, шаналж байна.

6

-Хоёр хүүхэд чинь хаана байгаа вэ?

-Хоёр бага хүүхэд маань Хөвсгөл аймгийн Тариалан суманд хадмынд байгаа. Бага охин маань өнгөрсөн оны есдүгээр сард явсан. Дундуур нь миний биеийг улам доройтоход хэзээ ч билээ нэг авчирсан. Охин маань намайг танихгүй байсан /уйлав/.

6

-Таньд кесарева хийсэн эмч нар мөнгө өгч байгаа юу?

-Оюунгэрэл эмч хэд хэд хувааж хоёр сая гаруй төгрөг л өгсөн. Одоо утсаа ч авахгүй байгаа. Ажлаас нь халсан гэж хэлсэн. Гэхдээ нэг хүн надад “Тэр эмч чинь хувийн эмнэлэгтэй” гэж байсан. Бодвол ажлаас халагдсан нэртэй эмчийн ажлаа хийгээд явж байгаа биз” хэмээн ярилаа.

 Э.Хонгорзулын идсэн  хоол унд нь хэвлийгээрээ гарсаар өдөрт дунджаар 50 кг-ын шуудай дүүрмээр их гардаг гэсэн.

 6

 Л.ЭРХЗАЯА: Хэргийг хэрэгсэхгүй болгох саналыг прокурорт хүргүүлсэн

 6

Энэ талаар мөрдөн байцаагч Л.Эрхзаяагаас тодруулахад, “Шүүх эмнэлгийн дүгнэлт “Э.Хонгорзул марль залгисан байх магадлалтай, кесарева хагалгаа хийх үед нарийн гэдэсний хөндийд самбай орох боломжгүй” гэж гарсан учраас бид энэ хэргийг хэрэгсэхгүй болгох саналыг прокурорт хүргүүлсэн. Гэхдээ энэ хэрэг ингээд хаагдаад өнгөрөх юм биш. Прокуророос хэрэгсэхгүй болгосон ч Э.Хонгорзул дахин шинжилгээ хийлгэх гомдол, хүсэлт гаргавал мөрдөн байцаалтад буцаж ирэх нь тодорхой” гэсэн юм.

 6

Ц.ГАНБОЛД: Эмч нар марль хэвлийн хөндийд үлдээгээгүй

 6

Тиймээс манай сурвалжлах баг Шүүхийн шинжилгээний үндэсний хүрээлэнг зорьж, дээрх дүгнэлтийг гаргасан /ШЭШХ/-ийн ахлах зэргийн шинжээч эмч Ц.Ганболдтой уулзлаа. Тэрээр “Э.Хонгорзултай холбоотой материалыг бүгдийг нь прокурорт хүргүүлсэн, харуулах юм байхгүй. Ер нь бол хоол боловсруулах эрхтэн чинь улаан хоолой, ходоод, нарийн, бүдүүн, шулуун гэдсээр дамжиж, ялгадас болж гардаг. Э.Хонгорзулын хэргийн материал, өвчний түүхийг нь үндэслэн дүгнэлтээ гаргадаг. Эндээс харахад, “Э.Хонгорзулын нарийн гэдэс, бүдүүн гэдсийн уулзварт марль нь орсон байсан. Тэгэхээр нь эмч нар гэдсэнд нь үүссэн шархаар нь гэдсэн доторх самбааг нь гаргав. Тэгээд шархтай гэдсийг тайрав” гэж бичсэн байна. Э.Хонгорзул кесарева хийлгэсэн. Эмч нар марлиа хэвлийн хөндийд үлдээгээгүй. Марль хэвлийн хөндий биш гэдэснээс гарч ирсэн. Гэтэл Э.Хонгорзулаас гарсан марль хоол боловсруулах эрхтэнд орсон байсан. Энэ марль амны хөндийгөөр, эсвэл шулуун гэдсээр орсон гэсэн үг. Өөр мэдээлэл өгөхгүй” гэв.

6

Ямартаа ч, эмч нарын хариуцлага алдсан дүр зургийг хууль хяналтын байгууллага нь  халхалж ядарсан иргэдээрээ тохуурхаж сууна. Ийм л учраас эрүүл мэндийн салбар мэдлэггүй дорой эмч нараар дүүрч, уг салбар ялзраад байгаа биз. Тэдний энэ болчимгүй үйлдлээс болж ид хөдөлмөрлөх насны энэ бүсгүй эрүүл мэндээрээ хохирч хүний гар харан амьдарч байхад  тэд бие биеэ хаацайлан өмөөрсөөр байна.

Б.Одон

Гэрэл зургийг Б.Бат