Facebook хуудас хөтлөгч залуусын “Цагаан тагтаа” групп долоо хоног бүрийн бямба гаригт нийгмийг сайн сайханд уриалсан өдөрлөг зохиож байна. Энэхүү хөтөлбөрийн эхлэл нь энэ сарын 1-нд буюу хүүхдийн эрхийг хамгаалах өдрөөр гэр бүл дэхь хүүхдийн хүчирхийллийн эсрэг "Инээмсэглэлийг хайрлая" сэдвийн хүрээнд өрнөсөн юм. Залуусын санаачилгыг “М Си Эс Кока Кола” ХХК дэмжиж, ивээн тэтгэжээ. Энэ өдөрлөгөөрөө дамжуулан тэд “Хүүхэд бүр гэр бүлдээ амар тайван амьдарч, гэгээн сайхан инээмсэглэлээр дүүрэн байх учиртай” гэж хэлэхийг зорьсон байна. “Цагаан тагтаа” группийн 200 орчим залуу сайн дурын үндсэн дээр, цалин хөлсгүйгээр “М Си Эс Кока Кола” ХХК-ийн Happiness center-ээс гараагаа эхлэн, Эрх чөлөөний талбай, Сүхбаатар талбай, Үндэсний соёл амралтын хүрээлэн, Үндэсний цэцэрлэгт хүрээлэн гэсэн маршрутаар аялж, 1000 гаруй хүүхэд бүрт “инээмсэглэсэн” зурагтай агаарын бөмбөлөг бэлэглэсэн юм. Мөн Хавдар судлалын үндэсний төвд эмчлүүлж байгаа 30 хүүхдэд баярын бэлэг өгчээ. Энэхүү сайн үйлсийн аян энэ оныг дуустал бямба гариг бүрт үргэлжлэх энэ арга хэмжээ өнгөрсөн долоо хоногт "Тамхигүй Монгол" сэдвээр өрнөсөн. Энэ арга хэмжээг “Содонсолушн” ХХК ивээн тэтгэсэн байна. “Цагаан тагтаа” группийн 100-гаад гишүүн сайн дураараа Их дэлгүүрийн урд талын усан оргилуураас эхлэн “Улаанбаатар” зочид буудал хүртэл төв гудамжаар алхаж тамхины хор хөнөөлийн талаар залуустай ярилцаж, хорт зуршлаас хол байхыг уриаллаа. Ингэхдээ тэд “Нэг өдөр тамхи татахгүй, оронд нь иштэй чихэр идье” хэмээн уриалж 3000 тамхийг 3000 чихрээр сольж, устгасан байгаа. Дараагийн өдөрлөг ирэх бямба гаригт цусны донор болохыг уриалсан “Нэг дусал=Нэг амь” сэдвээр өрнөх юм.

Тамхиа модтой чихрээр солих уу?  

Найрсаг залуусын “Цагаан тагтаа” бүлгэм татаж амжаагүй тамхийг модтой чихрээр солих аян өрнүүллээ. Тэд “Тамхи шинэ үеийн сонголт биш” гэж хэлж байна. Тиймээс гудамжинд тааралдсан хүмүүст “тамхигүй”, “чихэртэй” инээмсэглэл бэлэглэсэн юм. Тамхины найрлагад хүний биед хэрэгтэй ганц ч бодис байхгүй. Тамхи хоол биш. Тамхи эрүүл мэнд, залуу нас, гоо сайхныг тань  чимээгүйхэн сорж байгааг залуус тааралдсан хүмүүстээ хэлж, сануулж явлаа. “Тамхигүй Монгол” аян Улсын их дэлгүүрийн урд талын усан оргилуураас эхлэн, Улаанбаатар зочид буудал хүртэл төв зам дагуу өрнөсөн. Найрсаг залуустай тааралдсан эрхмүүд тамхиа модтой чихрээр солихдоо сэтгэл хангалуун инээмсэглэж байсан юм. Тэд залуусын хөдөлгөөнийг дэмжиж байгаагаа илэрхийлж, удахгүй тамхинаас гарах зорилго тавьчихаад байгаагаа ч дэлгэсэн. Тамхи шүд шарлуулж, уушиг хордуулан, элдэв өвчин үүсгэдэг. Тамхи эр хүнийг хүч тамиргүй, сул дорой нэгэн болгож, эмэгтэй хүнээр дамжин,  урагт нөлөөлдөг. Харин Монголын залуус цав цагаан шүдээ яралзуулан инээмсэглэж, цээж дүүрэн амьсгалан, эрүүл саруул амьдарч, их зүйл хийж бүтээх хүсэл мөрөөдлөөр жигүүрлэн яваа. Тиймээс тэд тамхигүй ирээдүйг сонгож байна. Найрсаг залуусын “Цагаан тагтаа” бүлгэм хүүхэд бүр хүчирхийлэл, дарамтаас ангид,  гэр бүлдээ амар тайван амьдрах эрхтэйг сануулж, “Инээмсэглэлийг нь хайрлая” аян Олон Улсын Хүүхдийн баяраар зохион байгуулсан. Энэ удаа “Тамхигүй Монгол” аянаа  программ хангамжийн салбартаа тэргүүлэгч “Содонсолушн” ХХК-ийн ивээн тэтгэлгээр амжилттай хэрэгжүүллээ. Аяны хүрээнд залуус 3000 гаруй тамхийг модтой чихрээр сольж, устгасан байна. Нийгмийг сайн сайханд уриалсан “Найрсаг амьдаръя” төсөл энэ он дуустал хэрэгжинэ. 7 хоног бүрийн Бямба гарагт найрсаг амьдралын эхлэл чухам юу болохыг залуус олон нийтэд мэдрүүлэх юм. Харин энэ Бямба гарагт хэн нэгний амьдралыг аврахын төлөө цусаа хандивлахыг уриалж,  “Нэг дусал=Нэг амь” аян өрнүүлэх нь ээ. https://www.facebook.com/groups/tsagaantagtaa/ http://youtu.be/2qwfe7gw-v4