Хойд Солонгосын удирдагч Ким Чен Ун гадаад харилцаагаа өргөжүүлэхээр итгэмжилсэн төлөөлөгчөө ОХУ руу илгээхээр болсон гэж тус улсын “KCNA”агентлаг мэдээллээ. Агентлагийн мэдээлж буйгаар “Хөдөлмөрийн намын орлогч дарга Сое Пен ОХУ-д очихоор болсон. Ямар шалтгаанаар Орост очиж буй болон хэнтэй уулзах нь одоогоор тодорхойгүй байна” гэжээ. Сое Пен өнгөрсөн сард Өмнөд Солонгосын Инчеон хотноо зохион байгууллагдсан Азийн зуны спортын наадмын хаалтын ёслолд оролцож, анх удаагаа олны өмнө гарсан билээ. Тэрбээр тус улсын Ерөнхийлөгч Пак Ын Хэ болон Ерөнхий сайд Чон Хон Вонтой биечлэн уулзсан юм.

Өмнөд Солонгосын Засгийн газрын таамаглаж байгаагаар “Ким Чен Ун ОХУ-ын Ерөнхийлөгч В.Путинээс эдийн засгийн тусламж авахаар зэхэж байгаа” гэсэн байна.  2011 онд Ким Чен Ун Хойд Солонгосын удирдагчаар сонгогдсоныхоо дараа төлөөлөгчөө аль ч улс руу илгээгүй билээ.

Б.Дэлгэрцэцэг