Төрийн байгуулалтын байнгын хорооны хуралдаанаар Засгийн газрын бүтэц, бүрэлдэхүүний төслийг хэлэлцэх эсэхийг шийдлээ. Монгол Улсын Ерөнхий сайд Ч.Сайханбилэг Засгийн газрын бүтэц, бүрэлдэхүүний талаарх төслөө танилцуулсны дараагаар гишүүдийн асуулт тавьж, саналаа хэлсэн юм. УИХ-ын гишүүн Х.Тэмүүжин Боомтын захиргаа, Тахарын албыг татан буулгах гэж байгааг эсэргүүцэн, шинэчлэлд дөнгө тавьж байна хэмээн шүүмжилж байсан бол гишүүн Ц.Оюунгэрэл “Монголын өв соёлыг  байхгүй болгож байна. ССАЖЯ байгуулагдсанаас хойш аялал жуучлалын бааз, хөрөнгө оруулалт нь ч жилээс жилд нэмэгдсээр ирсэн. Гэтэл Засгийн газрын бүтэц, бүрэлдэхүүнийг хэлэлцэж, зөвшилцөхдөө тэлсэн мөртлөө, ганцхан манай яамаар өвлийн энэ цагт идэш хийчихлээ” хэмээн бухимдаж байлаа.

Байнгын хорооны дийлэнх гишүүд Засгийн газрын бүтцийг хэлэлцээд, асуудлаа шуурхай шийдвэрлэн, ажиллуулах нь зүйтэй гэсэн байр суурьтай байсан юм. Монгол Улсын Ерөнхий сайд Ч.Сайханбилэг:

-Бүгдээрээ асуудлаа шийдээд явъя гэдэг дээр санал нэгдэж байна. Асуудлыг жижгээр бус том зургаар нь харах хэрэгтэй. Засгийн газар үйл ажиллагаагаа явуулж байх үед ч асуудал их гарна, санал ч зөрөлдөнө. Хамгийн гол бид зөв шийдвэр гаргах ёстой. Засгийн газрын бүтэц, бүрэлдэхүүнийг нэмэгдүүлж, илүү гаргасан зүйл байхгүй. Хэмнэлт Засгийн газрын танхимд явагдахгүй. Харин үүнээс бусад салбаруудад явагдана. Шинэ яам үйлдвэрлээгүй. Өмнөх парламентуудын үед ч Засгийн газрын бүтэц 19 сайдын дотор л явж ирсэн. Соёл, спорт аялал жуучлалын асуудлыг холбогдох салбаруудад нь хариуцуулсан. Нийгэмд буруу ойлголт өгөх хэрэггүй.  Засгийн газрын бүтэц, бүрэлдэхүүнээ шуурхай шийдвэрлүүлэхийн тулд би Тахарын алба, ЦЭГ-ыг татан буулгах тухай хуулийн төслөө татаад авъя. Энэ асуудлыг дараагаар нь хэлэлцүүлье. Би нийтдээ 57 байгууллагын асуудал оруулж ирнэ. Тэр үед нь хэлэлцүүлье.

Ийнхүү Засгийн газрын бүтэц, бүрэлдэхүүнийг хэлэлцэх асуудлаар санал хураалт явуулахад байнгын хороодын гишүүдийн 80 хувийн саналаар дэмжив. Одоо чуулганы нэгдсэн хуралдаанаар дээрх асуудлыг хэлэлцэх юм.

Н.Энх