Ардчилсан хувьсгал ялсны 25 жилийн ойн өдрийг угтан өчигдөр Баянгол дүүргийн нутаг дэвсгэрт “ТБД андууд”-ын урд “Ардчиллын өндөрлөг” хөшөөт цогцолборын нээлт боллоо. Энэхүү хөшөөт цогцолборыг ардчиллын дууч,  “Хонх” хамтлагийн ахлагч С.Цогтсайханы дурсгалд зориулан УИХ-ын гишүүн, Монгол Улсын Засгийн газрын гишүүн С.Эрдэнийн санаачилгаар байгуулсан аж.

\\\\

Тэрбээр цогцолборын нээлтийн үеэр “25 жилийн тэртээ ардчиллын дуу хоолой, ардчиллын дууч шувуухай болж явсан “Хонх” хамтлагийн үүсгэн байгуулагч, ахлагч, тэр үеийн ардчиллын сүлд дуу болох “Хонхны дуу”-г зохиож, дуулж явсан Цогтсайхан агсандаа зориулж “Ардчиллын өндөрлөг” хөшөөт цогцолборыг барьж байгуулах ажилд гар, бие оролцсон бүх хүнд талархал илэрхийлье. Зуун дамжсан суут бүтээл гэдгийг бид бүгдээрээ хүлээн зөвшөөрдөг. “Хонхны дуу”-гаар бид зоригжиж, урам авч, ардчилсан хувьсгалын төлөө хүн бүрийн зүрх хамтдаа цохилж байсан гэдэгт бүгд санал нийлэх биз ээ. Энэ хөшөө ардчилсан хувьсгалын 25 жилийн түүхийг хойч үедээ өвлүүлж үлдээх томоохон бүтээл болно гэдэгт эргэлзэхгүй байна. Ардчилсан хувьсгалын партизанууд, үе, үеийн хамтран зүтгэгч, журмын нөхөдтэйгээ энэхүү хөшөөний өмнө уулзаж байгаадаа сэтгэл өндөр байна” гэлээ.

a

УИХ-ын дарга, АН-ын дарга З.Энхболд “Д.Цогтсайхан бол шилдэг нийтлэлч, улс төрийн манлайлагч, ардчиллын сүлд дуу “Хонхны дуу”-ны зохиогч гэдгийг бид бүгд мэднэ. Маш олон дуу төрдөг боловч маш цөөхөн дуу олон арван жил, хэдэн зуун жил дамжин дуулагддаг. Тэдгээрийн нэг бол “Хонхны дуу” юм. 25 жилийн турш энэ дууг олуулаа, цөөхүүлээ, залуу дуучид гээд маш олон хүн дуулж байгаа, хүн бүрийн сонсох дуртай дуу хэвээрээ байна. Монголд ардчилсан парламентын тогтолцоог үүсгэн бэхжүүлэхэд, ардчиллын үнэт зүйлсийг бий болгоход түүхэн үүрэг гүйцэтгэсэн түүний гавъяаг үнэлж, хойч үеийнхний бахархал болсон халуун эх орончийн дурсгалыг хүндэтгэж, энэхүү хөшөөг бүтээсэн уран бүтээлч, түүнийг дэмжиж тусалсан бүх хүмүүст УИХ болон Ардчилсан намын нэрийн өмнөөс талархал илэрхийлье” гэсэн юм.

a

Энэхүү цогцолборын нээлтэд С.Цогтсайхан агсны гэргий Наташа оролцсон. Тэрбээр “Бид 25 жилийн өмнө хамтдаа тэмцэж явсан анд нөхөд, бусад бүх хүнийг дурсан санаж байна. Цогтсайханы хөшөөг босгох талаар хэдэн жилийн турш яригдсан ч мөнгө санхүүгийн боломж бүрдэхгүй байсан. Гэтэл бидний дотны анд, УИХ-ын гишүүн С.Эрдэнийн санаачилга, дэмжлэгтэйгээр энэ сайхан хөшөөт цогцолбор бослоо. Цогтсайхан маань ардчилсан хувьсгалд  гурван зүйлээр найз нөхөд, ард түмнээ манлайлан оролцсон гэж би боддог. Нэгдүгээрт, улс төрийн “Шинэ үе” бүлгэмийг үүсгэн байгуулж, монголд ардчилсан хөдөлгөөн өрнөхөд бүхий л хүч чадлаа зориулсан. Хоёрдугаарт, түүний зохиосон олон дуу монголын ард түмнийг ардчилалд уриалан дуудаж байсан. Гуравдугаарт, монголын сэтгүүл зүйн салбарт шинэчлэл хийж, олон арван зохиол туурвиснаараа ардчиллын оюун санааны үнэт зүйлсийг бий болгож чадсан. Түүний маань зохиосон “Хонхны дуу” мянга мянган хүний сэтгэлд хоногшин үлдсэнээрээ өнөөдөр энэ хөшөө сүндэрлэн босч байна” хэмээсэн юм.

sa

Нээлтийн үеэр УИХ-ын гишүүн С.Эрдэнэ хөшөөт цогцолборын жижиг хувилбарыг зочдод гардуулж, “Хонх” хамтлагийн дуучин н.Энхбаяр “Хонхны дуу”-г цуурайтуулж, олны сэтгэлийг ихэд хөдөлгөж байлаа.

sz

б

П.Наран