Эрүүл мэнд, спортын сайдад нэр дэвшсэн МАХН-ын Ерөнхий нарийн бичгийн дарга Г.Шийлэгдамбыг сайдаар томилох эсэх асуудлыг УИХ-ын чуулганаар хэлэлцэж, 88.3 хувиар дэмжиж баталлаа.

й

Гишүүд нэр дэвшигчид хандан “ Эрүүл мэндийн салбар маш хүнд байдалтай байгаа. Салбарыг уналтаас аврахад маш их хөдөлмөр шаардана. Ажиллах хугацаа бага байна. Хийх юм их байгаа. Мэргэжлийн бус хүн учраас мэргэжлийн хүний зөвлөгөөг сайн аваарай. Эрүүл мэндийн салбарт тогтолцооны гажуудал байгаа тэр алдаа оноог зөв олоорой. Сайд солигдохоор эмнэлгийн дарга ч солигддог. Улс төржилтөд өртсөн салбар шүү. Санхүүжилтийн асуудлыг зөв шийдвэрлэж, зөв зохицуулалт хийх хэрэгтэй. Хөрөнгө мөнгө их шаардагддаг, тоног төхөөрөмж нь хоцрогдсон энэ салбарт хийж хэрэгжүүлэх ажил их бий. Ажилдаа чин сэтгэлээсээ хандаж, улс төржилгүй ажиллаасай гэж хүсэж байна” хэмээн санал хэллээ.

й

УИХ-ын гишүүн Ц.Нямдорж харин “Би нэр дэвшигч Г.Шийлэгдамбыг сайд болох гэж байгаа асуудлыг дэмжихгүй ээ. Гэхдээ бусад нь дэмжээд сайд болгочих байлгүй. Тэгэхээр нэр дэвшигчид хэдэн зүйл захиж хэлмээр байна. Эрүүл мэндийн салбарт ажиллаж байгаа хүмүүсийн нус нулимсийг бага урсгаарай. Монголчуудын эрүүл мэндийн төлөө чадан ядан ажиллаж байгаа хүмүүсийг дарамталсаар байгаад элгээр нь хэвтүүллээ. Чамайг эрүүл мэндийн салбарыг аварна гэдэгт итгэхгүй байна. Эмнэлгийг булаагаад авчихаж байхад гурван жилийн хугацаанд Н.Удвал сайд нэг ч удаа ирээд уулзаагүй. Чи энэ салбарыг аврахыг хүсвэл Хууль зүйн сайд Д.Дорлигжавтай уулзаад байшингаа авчихаач. Хэрүүл бугласан эрүүл мэндийн салбартаа ном уншуул” гэсэн юм.

й

Ингээд гишүүдийг үг хэлж дууссаны дараа санал хураалт явуулснаар МАХН-ын Ерөнхий нарийн бичгийн дарга Г.Шийлэгдамба Эрүүл мэнд, спортын сайдаар томилогдов.

й

П.Наран