Монгол Улсын Ерөнхийлөгч зарлиг гаргаж, “Хонхны дуу”-нд Төрийн соёрхол хүртээлээ. Энэ үеэр “Хонхны дуу”-ны үг, аяыг зохиосон “Хонх” хамтлагийн ахлагч С.Цогтсайхан агсны   гэргий Н.Наташа, “Хонх” хамтлагийн дуучин Энхбаяр нарын сэтгэгдлийг сонссон юм.

ө

“Хонх” хамтлагийн ахлагч С.Цогтсайхан агсны гэргий Н.Наташа: Хүнлэг Ерөнхийлөгчдөө баярлалаа

-Ардчилсан хувьсгалын 25 жилийн ойн өдрүүдэд Цогоогийн минь гэрэлт хөшөөг босгож, түүний минь зохиосон “Хонхны дуу” бүтээлд Төрийн шагнал өгсөн нь мартагдашгүй үйл явдал болж байна. Зохиогч нь байхгүй байхад бүтээлд нь шагналд хүртээсэн нь сайхан үйл явдал. Цогоо маань бурхан болоод 10 жил өнгөрсөн боловч түүний гэр бүл, хоёр хүүхдэд минь байнга тусалж ирлээ. Ерөнхийлөгч Ц.Элбэгдорж үр хүүхдүүдэд минь аавынх нь оронд аав болж, эрдэм боловсролд нь санаа тавьж, амьдралын анхны алхмаа хийхэд нь тусалж анхаарч ирсэн. Үр хүүхдүүдийг минь тав тухтай нөхцөлд амьдруулахыг зорьж Ерөнхийлөгчид өгсөн хоёр өрөө өргөө цагаан гэрээ бэлэглэсэнд нь бэлэгшээж явдаг. Өнөөдөр ардчиллын төлөө хамт тэмцэж  явсан журмын нөхөр нь байхгүй ч гэсэн түүний ар гэрийнхэнд нь санаа тавьж, бүтээлд нь төрийн шагнал хүртээсэн хүнлэг Ерөнхийлөгчдөө дахин дахин баярласнаа илэрхийлж, үр хүүхэд, гэр бүлд нь сайн сайхныг хүсэн ерөөе.

х

Хонх хамтлагийн дуучин н.Энхбаяр:

-Би энэ дууг хэзээ нэгэн цагт Төрийн соёрхол авах байх гэж бодож байсан. Үүнийгээ би хаана ч хэлдэг. Энэ дуу бол үнэхээр ардчиллын сүлд дуу гэдэгтэй маргах хүн байхгүй. Энэ дууг бүтээлцэхэд өөрийн ухааныг дайчилсан нөхдөд баярлалаа. Мөн “Соёл-Эрдэнэ” хамтлагийн бөмбөрчин Цолмон, даралтат хөгжимчин Батболд, даралтат гитарчин агсан Дамдинсүрэн нар хамт тоглож байлаа. Соёл-Эрдэнэ хамтлагийн дуучин агсан Баяраа, хөгжимчин агсан  Галсанбат нар биднийг бичлэг хийж байх үеэр дэм өгч байлаа. Эдгээр нөхөддөө их баярлаж байна. Баярлаж, талархаж явдгаа дахин дахин илэрхийлье.

а

Н.Энх