Сингапур Улсын Буудлагын холбооноос зохион байгуулсан “АСЕАН-ы гишүүн орнуудын Буудлагын аварга шалгаруулах тэмцээн” болон “Сингапурын нэрэмжит буудлагын аварга шалгаруулах тэмцээн 2014”-т Монгол Улсын Буудлага спортын холбооны залуу баг тамирчид оролцжээ. Манай тамирчдаас 10 метрийн эрэгтэй хийн гар бууны төрөлд Б.Ган-Очир “Алтан медаль”, Л.Мөнх-Эрдэнэ “Мөнгөн медаль”, 10 метрийн эмэгтэй хийн гар бууны төрөлд Б.Энхжин “Хүрэл медаль”, 25 метрийн эмэгтэй спорт гар бууны төрөлд А.Ичинхорлоо “Хүрэл медаль” хүртсэн байна. Малайз, Монгол, Мьянмар, Тайланд, Вьетнам, Филиппин зэрэг улс орон болон БНХАУ-ын Засаг захиргааны онцгой бүс Хонконг, Макао мөн Тайваний нийт 12 багийн 100 гаруй мэргэн бууч хүрэлцэн ирж авхаалж, самбаа онч мэргэнээ сорин өрсөлдсөн уг тэмцээнд үлэмлэхүй амжилт үзүүлэн оролцсон Монголын буудлага спортын холбооны Б.Энхжингээр ахлуулсан 6 тамирчинг Элчин сайд Б.Дэлгэрмаа ЭСЯ-ны байранд хүлээн авч уулзаж, баяр хүргэж, гаргасан амжилтаа цаашид улам ахиулан, тив, дэлхий, олимпийн аварга болж, эх орныхоо нэрийг өндөрт өргөж явахыг ерөөн хувиасаа мөнгөн урамшууллаар мялаажээ.