Нийслэл хотын иргэдийн тулгамдсан олон асуудлуудын нэг нь хүүхдийн эмнэлэг. Хүүхдийн эмнэлгийн хүрэлцээ хангамжаас дутмагаас эмч эмнэлгийн ажилчдын ачаалал нэмэгдэж, хэвтэн эмчлүүлэгч хүүхдүүд ээж аавынхаа хамтаар ор хүрэлцэхгүй газраар хэвтэж байгаа дүр зураг танил болоод удаж буй. Ялангуяа хүйтэн сэрүүний улиралд эмнэлгийн ачаалал дээд цэгтээ хүрч, эмнэлэгт хэвтэж эмчлүүлэх гэсэн биш нэмж өвчин авах нь холгүй хэд хоног хэвтэх гэж бөөн асуудал үүсдэг. Нийслэлчүүдийн сэтгэл зовоосон энэ асуудлын шийдвэрлэх эхний алхам болгож, Ерөнхий сайд Ч.Сайханбилэгийн толгойлсон Шийдлийн Засгийн газраас Зам тээврийн яамны барилгыг хүүхдийн эмнэлэг болгох шийдвэр гаргаад удаагүй байна. Засгийн газрын энэхүү шийдвэрийг ирэх 2015 оны хоёрдугаар сар гэхэд биелүүлж, албан тасалгааны өрөөнүүдийг эмнэлэг болгон өөрчлөх даалгаварыг Эрүүл мэнд, спортын сайд Шийлэгдамбад даалгаад байгаа.

Й

Тэгвэл өнөөдөр УИХ-ын Нийгмийн бодлого, боловсрол, соёл, шинжлэх ухааны байнгын хорооны гишүүд Зам тээврийн яам байрлаж буй Засгийн газрын XIII байрны барилга болон Төрийн албан хаагчдын нэгдсэн эмнэлгийн барилгын ажлын явцтай танилцсан юм. Тус ажлын хэсгийн ахлагчаар УИХ-ын гишүүн Г.Баярсайхан ажилласан бол УИХ-ын гишүүн Ё.Отгонбаяр, Д.Арвин нар ажлын хэсгийн гишүүдээр ажиллалаа.

й

Яамны барилгыг 1 тэрбум гаруй төгрөгөөр засаж янзалжээ

Й

Ажлын хэсгийн ахлагч УИХ-ын гишүүн Г.Баярсайхан энэхүү уулзалтын эхэнд “УИХ-ын Нийгмийн бодлого, боловсрол, соёл, шинжлэх ухааны байнгын хорооноос Монгол улсад нэн шаардлагатай байгаа хүүхдийн эмнэлэг болон эмнэлгийн зориулалтаар баригдсан бусад барилгыг зориулалтаар нь ашиглах талаар судлах ажлын хэсэг байгуулагдсан. Өнөөдөр та бүхэн манай улсын эрүүл мэндийн салбарт тулгамдаж буй асуудлуудыг мэдэж байгаа. Хүн амын өсөлт, төрөлт нэмэгдсэнтэй зэрэгцэн хүн амын өвчлөл, хэвтэн эмчлүүлэгчдийн тоо улсын хэмжээнд өссөн тул эмнэлэг, орны тоог нэмэх нэн шаардлагатай байгаа. Энэ ажлын хүрээнд бид танай яаманд ирээд байна. Засгийн газраас анх Соёл спорт аялал жуулчлалын яамыг хүүхдийн эмнэлэг болгох шийдвэр гаргасан. Манай ажлын хэсэг судлаж үзээд эмнэлэг болгох боломжгүй хуучирч муудсан барилга гэсэн дүгнэлт гарган өөр арга зам хай гэсэн хариу шаардлага тавьсан юм. Зам тээврийн яамны хувьд 1986 онд ашиглалтад орсон чанарын хувьд онцсайн, угсармал шугаман суурьтай, цутгамал баганатай, зоорьгүй дөрвөн давхар барилгатай юм. Энэ барилгыг хүүхдийн эмнэлэг болгон ашиглахад хэдий хэрийн хөрөнгө шаардлагатай вэ гэдгийг тооцолохыг Эрүүл мэнд, спортын сайд Г.Шийлэгдамбад үүрэг болгосон байгаа. Шаардлагатай хөрөнгийг Засгийн газар гаргана. Зам тээврийн яамныхан асуудал босгож байна. Бид энэ барилгыг оффисын зориулалтаар засаж янзлахад 1 тэрбум гаруй төгрөгөөр засаж янзалсан байгаа. Нүүхэд 200-300 сая төгрөг шаардлагатай гэдэг зүйлийг ярьж байна. Гэхдээ бодит байдал дээр Монгол Улсын ирээдүй болсон эх, нялхас хүүхдийнхээ төлөө мөнгө тоолох нь хэр зохистэй юм бэ гэдэг асуудал байгаа шүү. Шаардлагатай бол тэр байтугай мөнгийг ирээдүйнхээ төлөө гаргана. Монгол Улсын Засгийн газарт шаардлагатай хөрөнгийг гарга гэж манай ажлын хэсгээс дүгнэлт гаргаж өгнө” гэлээ.

й

Хувийн компани биш Засгийн газрын шийдвэрээ дага

Й

УИХ-ын гишүүн Ё.Отгонбаяр энэ үеэр “Эрүүл мэндийн яамнаас асуухад та нар энэ барилгыг эмнэлгийн зориулалтаар өөрчлөхөд шаардлагатай урсгал зардал болон бусад тооцоог хэзээ гаргаж дуусах вэ. Цаг хугацаа алдаж болохгүй. Энэ долоо хоногт УИХ-аар 2015 оны төсвийн тодотгол яригдана. Эхний байдлаар багцаалсан төсвөө оруулж ир. Засвар шинэчлэлийн ажлаа эхлүүлсэн хойноо он гаргаад нэмэлт санхүүжилтээ шийдвэрлэх хэрэгтэй. Тэгэж л УИХ-аар санхүүжилтээ шийдвэрлэхгүй бол мөнгөгүй яам болоод энэ ажлаа ч хийж чадахгүй хоцорно шүү. Зам тээврийн яамныханд хандаж хэлэхэд нүүх асуудал хүнд хэцүү байна гэдэг асуудлыг ярих хэрэггүй. Нүүх асуудлаа шийд ээ. Засгийн газрынхаа шийдвэрээ дагах хэрэгтэй. Бидэнд өгсөн танилцуулгаас харахад та бүхэн барилгаа өгөхгүй гэсэн байр сууринаас хандсан байна. Энэ асуудлыг Засгийн газар дээрээ ярихгүй яагаад Байнгын хорооны гишүүдэд өгч байгаа юм. Засгийн газрын шийдвэртэй санал нийлэхгүй бол та бүхэн өөрсдийн шийдвэрийг гаргаж болно шүү” гэж мэдэгдсэн юм.

Й

Харин УИХ-ын гишүүн Д.Арвин хэлэхдээ “Энд аль нэг яам нь ажлаа танилцуулах асуудал байхгүй. Засгийн газрын шийдвэрийн дагуу Зам тээврийн яам шинэ байр руугаа нүүх хэрэгтэй. Эрүүл мэндийн яам яаралтай энэ байрандаа ажлаа эхлүүлэх хэрэгтэй. Зам тээврийн аямныхан ч гэсэн 200-300 сая төгрөгөө хүлээгээд суугаад байх хэрэггүй. Ямар хувийн компанийг гаргаж байгаа биш Засгийн газрын шийдвэрээ дагах хэрэгтэй” гэлээ.

й

Гишүүдийг байр сууриа илэрхийлсэний дараа ажлын хэсгийн ахлагч Г.Баярсайхан  “Өнөөдөр нийслэл хотод 450 мянга гаран хүүхэд бий. Олон улсын эрүүл мэндийн байгууллагаас тогтоосон стандартаар 1000 хүүхэд тутамд эмнэлгийн 4-5 ор ногдох ёстой гэдэг. Энэ жишгээр тооцвол нийслэлд хүүхдийн эмнэлгүүд нийлээд 1800 ортой байх ёстой. ЭХЭМҮТ-д 402, дүүргүүдэд 670 ор байна. Тэгэхээр  728 ор дутуу байгаа. Энэ дутуугаа нөхөх ёстой. Шийдлийн Засгийн газар шийдвэрээ гаргасан байна” гэдгийг дахин сануулсан.

й

Өөр байгууллагаа  оруулна гэсэн бол бид татгалзах байсан

й

Түүний энэ сануулгын дараа Зам тээврийн сайд  Н.Төмөрхүү “Манай яамны барилгыг хүүхдийн эмнэлэг болгох гэж байгаа учраас л бид суллаж өгч байна. Монголын хойч ирээдүйд хэрэгтэй эмнэлэг болгох гэж байгаа учраас бид нүүхэд татгалзахгүй. Харин өөр байгууллагаа  оруулна гэсэн бол бид татгалзах байсан” гэсэн юм.

й

Эрүүл мэндийн сайд Г.Шийлэгдамба “Яамны барилгыг 150 ортой хүүхдийн эмнэлгийн зориулалтаар өөрчлөхөд эхний ээлжинд 6.2 тэрбум төгрөгийн шаардлагатай гэсэн урьдчилсан тооцоо гарган Сангийн яаманд хүргүүлсэн байгаа. Үүнд тоног төхөөрөмж, урсгал зардалыг багтаасан. Засгийн газар дээр хүүхдийн эмнэлэг болгон өөрчлөх ажлыг богино хугацаанд засч янзлах үүрэг өгсөн тул эхний ээлжинд концессийн гэрээгээр ажлаа эхлүүлэхээр болсон” гэлээ.

я

Энэхүү мэдээллийн дараа ажлын хэсгийнхэн тус яамны зарим өрөө тасалгаануудаар орж үзсэн бөгөөд эмнэлгийн зориулалтаар өөрчлөх ажлыг хийж гүйцэтгэхэд өөрсдөөс шалтгаалах бүхнээ хийхээ мэдэгдээд, Төрийн тусгай албан хаагчдын эмнэлгийн барилгатай танилцахаар явсан юм.

й

б

П.Наран