УИХ-ын чуулганы нэгдсэн хуралдаанаар энэ оны төсвийн тодотголын төслийн анхны хэлэлцүүлгийг хийж байв. Гишүүд эдийн засгийг тэлэх бус хумисан төсөв хэмээн Засгийн газарт шүүмжлэлтэй хандаж байлаа. Тухайлбал УИХ-ын гишүүн Ч.Хүрэлбаатар “Дахиад л худлаа төсөв оруулаад ирлээ. Төсвийн тодотголын төслийг шинэ оны өмнө, хойно өргөн барихын ялгаа юу вэ? Яагаад эхний ээлжинд эхчүүдийн мөнгө рүү дайрдаг юм. Монголын нийгмийн 40 хувь нь ядуу болчихоод байгаа юм уу. Татвар нэмснээр хямралаас гарахгүй. Өр нэмэхгүйгээр төсөвлөөд явж болно. Хямралтай байгаа үед татвар нэмэх асуудал ширхэг ч байж болохгүй” хэмээн шүүмжлэв. Үүнд Ерөнхий сайд Ч.Сайханбилэг ”Таны хэлсэн “худлаа” гэсэн болгоныг чинь  засч оруулж ирсэн. Та “Энэ энийг зассан байна, сайн байна, гэхдээ” гээд ярьчих хэрэгтэй шүү дээ. Сэтгэл байгаад толгойгоо ажиллуулвал болно өрийг нэмэхгүй байж болно  гээд байна. Тэрийгээ хуваалцаач ээ. Дэд сайдуудын цалин хангамж 200 сая төгрөг байгаа. Алдарт эхийн одонгийн мөнгийг олгоход энэ 200 саяыг нэмлээ гэхэд цаана нь  дутаад байгаа мөнгийг хаанаас босгох вэ? Засгийнй газар хүний нүүргүй болчихсон юм биш”  хэмээн учирлаж харагдсан. 

Н.Нягт