УИХ-ын чуулганы үдээс хойшхи нэгдсэн хуралдаан эхэллээ. Үдээс хойшхи хуралдаанаар хоёр асуудал хэлэлцэх юм. Эхлээд  Төсвийн тогтвортой байдлын тухай хуулийн төслийн эцсийн хэлэлцүүлгийг хийнэ. Дараагаар нь энэ оны төсвийн хүрээний мэдэгдлийн анхны хэлэлцүүлгийг хийхээр төлөвлөжээ.  Төсвийн байнгын хорооны хуралдаанаар Төсвийн тогтвортой байдлын хуулийн төслийг хэлэлцээд өрийн таазыг энэ оны ДНБ-ий 58.3 хувь, 2016 онд 55.2 хувь байхаар тус тус тусгасан байна. Хэлэлцэж байгаа асуудалтай холбогдуулан гишүүдийн асуултад Төсвийн байнгын хорооны дарга Б.Болор хариулав.

УИХ-ын гишүүн Ж.Батзандан:

-Төсвийн тогтвортой байдлын тухай хуулийн хариуцлагын хэсгийг Сангийн сайдад уншиж өгье. Төсвийн төсөл нь тусгай хэсгийн заалтыг хангах ёстой. Гэтэл өмнөх Засгийн газар төсвийн тогтвортой байдлын тухай хуулийг удаа дараа зөрчсөн учир огцорсон. Бид төсвийн өрийн тааз, босгыг нь одоо байгаа нөхцөлд тохируулаад өглөө. Энэ бол өмнөх Засгийн газрын үйлдсэн гэмт хэргийг хаацайлж байгаа хэрэг юм. Хэрвээ төсвийн сахилга батыг зөрчвөл Засгийн газрыг огцруулна шүү. Төсвийн байнгын хороо одоо хууль хяналтын байгууллага хандах уу? Төсвийн сахилга батыг зөрчсөн Н.Батбаяр, Н.Алтанхуяг нарт хариуцлага тооцох уу?

-Хариуцлагын асуудлыг одоогоор яриагүй байна. Энэ төсвийн төслийг оруулж ирсэн Засгийн газрын төслийг хэлэлцэж байгаа. Хариуцлага алдвал тооцоо хийнэ.

УИХ-ын гишүүн Ц.Нямдорж:

-Харамсалтай л юм болж байна. Ч.Сайханбилэг Ерөнхий сайд болчихоод Засгийн газрын үйл ажиллагаа, эдийн засгийн талаар мэдээлэл хийсэн. УИХ-д Засгийн газрыг бүрдүүлж байгаа нам эвсэл болгон Ч.Сайханбилэгийн хэлсэн асуудал болгоныг унагасан. Нам, эвслүүд Засгийн газарт итгэх итгэлгүй болжээ. АН, МАН, “Шударга ёс” эвсэл тус бүртээ хэлсэн үгийг нь эсэргүүцэж арга хэмжээ авсан.  Татварын, нийгмийн халамж, хүүхдийн мөнгөтэй холбоотой бүх саналууд нь уналаа. Засгийн газрын төсвийн тодотголтой холбоотой саналуудын нэг нь ч дэмжигдсэнгүй. Өнөөдөр ДНБ-ний 58.3 хувьд тогтоолоо. Хэдэн сарын дараа өрийн таазыг ДНБ-ий 70-80 хувь хүртэл нэмэгдүүлэх санал оруулж ирэх гэж байгаа юм биш биз. Одоо Засгийн газарт өрийн тааз нэмэгдүүлэх нь 2018 он хүртэл нээлттэй боллоо. Хамтарч Засгийн газар байгуулахдаа өрийн тааз нэмэгдүүлэхгүй гэсэн заалт нь байхгүй боллоо. Ч.Сайханбилэг УИХ-ын танхимд орж ирээд өрийн таазыг ДНБ-ий 70 хувьд хүргээд өгөөч гэсэн үг амнаасаа унагасан шүү.

-Тодорхой шийдэл гаргаад явъя гэсэн. Төсвийн тодотголоор Засгийн газар санал оруулж ирсэн боловч зарим нь өөрчлөгдсөн. Ард иргэд рүү чиглэсэн халамжийг хэвээр үлдээх хэрэгтэй гэж УИХ-ын гишүүд үзсэн. Өрийн таазыг ДНБ-ий 58.3 хувьд баталж байна. Засгийн газрыг  энэ хүрээнд ажиллах шаардлагыг Төсвийн байнгын хорооны зүгээс тавина.

Ийнхүү гишүүд асуулт тавьж дууссаны дараагаар санал хураалт явууллаа. Төсвийн тогтвортой байдлын тухай хуулиар гишүүдийн 3/2 нь дэмжсэн тохиолдолд батлагддаг. Төсвийн тогтвортой байдлын тухай хуульд өөрчлөлт оруулах тухай хуулийг гишүүдийн  92 хувийн саналаар баталлаа.

Үүний дараагаар энэ оны Төсвийн хүрээний мэдэгдлийн анхны хэлэлцүүлгийг хийлээ. Байнгын хорооноос Төсвийн хүрээний мэдэгдлийг анхны хэлэлцүүлгээр нь батлах санал гаргасан нь дэмжигдэв. Ийнхүү энэ оны Төсвийн тухай хуульд нэмэлт өөрчлөлт оруулах тухай хуулийг  гишүүдийн олонхийн саналаар батлав.

Н.Энх