Иракийн хэт даврагч “Халифын вант улс” бүлэглэлийн дайчдад барьцаалагдаж, өчигдөр амиа алдсан Японы иргэн, сэтгүүлч Кенжи Готогийн ээж Жунко Ишидо мэдэгдэл хийсэн тухай “NHK”агентлаг мэдээллээ. “Хүүгээ амиа алдсан гэдгийг сонсоод зүрх минь шархалж байна. Гото улс төр, эрх мэдлийн золиос болж амиа алдлаа. Үнэхээр харамсалтай. Ерөнхий сайд Шинзо Абе хүүг минь хамгаалж чадсангүй. Танд дахин итгэл хүлээлгэж чадахгүй” гэж Ишидо ярьжээ. Гото амиа алдсан гэдгийг тус улсын Батлан хамгаалахын сайд Гэн Накатани мэдэгдсэн юм. Тэрбээр “Барьцааны иргэн амиа алдсан” гэсэн билээ.

Сайдын мэдэгдлийн дараа Шинзо Абег буруутгах хүмүүс нэмэгдэж, хэвлэлийнхэн тайлбар шаардаж эхэлсэн юм. Абе “Амиа алдсан Кенжи Гото болон Харуна Юкавагийн гэр бүлд эмгэнэл илэрхийлж байна. Та хоёрын амийг заавал нэхэх болно. Өнөөдрөөс эхэлж Япон улс хэт даврагчдад цохилт өгөх болно. Мөн хэт даврагчдын эсрэг нэгдэж буй гүрнүүдэд үзүүлж буй тусламжаа нэмэгдүүлэхээр боллоо” гэсэн байна. Ерөнхий сайдын мэдэгдлийн хариуд Готогийн аминд хүрсэн хэт даврагч Жихади Жон гэгч “Японы Засгийн газар бидний эсрэг нэгдэж буй бол Японы иргэд аюулд орлоо. Бидний эзэмшилд нэвтэрсэн Япон иргэд, бидний хавханд орсон гэсэн үг. Дахин хэлэлцээр гэж үгүй” хэмээжээ.

Б.Дэлгэрцэцэг