Өнгөрөгч амралтын өдрүүдэд зарим хэвлэл мэдээлэл, цахим сайтуудаар Сонгинохайрхан дүүргийн Өмч, газрын харилцааны албаны дарга Э.Болорчулууныг тамгаа авч зугатлаа гэх мэдээлэл гараад байгаа.

ө

Уг мэдээлэлд түүнийг  “2013 оны хөрөнгө орлогын мэдүүлгийн араас хийсэн тандалтаар СХД-ийн Өмч, газрын харилцааны албаны дарга Э.Болорчулуун нэлээд хэмжээний хөрөнгөө нуусан болохыг АТГ-ынхан илрүүлжээ. Ингээд түүний шууд удирдлага болох Нийслэлийн өмч, газрын харилцааны албанд энэ талаар мэдэгдсэн байна. Хуулийн дагуу ийм зөрчил гаргасан этгээд хариуцлага хүлээх учиртай. АТГ-аас Э.Болорчулуунд хариуцлага тооцохыг “хүссэн” албан бичгийг Нийслэлийн өмч, газрын харилцааны албаны дарга Ш.Төмөрбаатарын нэр дээр хоёр ч удаа илгээжээ. Ш.Төмөрбаатар дарга ч энэ дагуу арга хэмжээ авч, Э.Болорчулууныг үүрэгт ажлаас нь чөлөөлсөн байна. Тэгтэл тэрбээр тамгаа аваад алга болсон гэнэ.  Учир нь түүнийг Авлигын эсрэг хуулийн 13 дугаар зүйлийн 13.8.4 дэх заалт буюу  нэг жилийн цалинтай тэнцэх буюу түүнээс их хэмжээний хөрөнгө, орлогыг мэдүүлээгүй, худал мэдүүлсэн, эсхүл хөрөнгө, орлогын мэдүүлгийг гаргаж өгөөгүй, гаргахаас татгалзсан бол албан тушаалаас нь огцруулах буюу ажлаас халах заалтын дагуу хариуцлага хүлээлгэхээр болсон байна. Гэтэл тэрбээр албан тушаалаас нь чөлөөлөх асуудал хөндөгдөх үед усанд хаясан чулуу шиг алга болоод бараг сар гаруй болж байгаа аж” хэмээн бичсэн байна.

ө

Уг мэдээллийн дагуу Сонгинохайрхан дүүргийн Өмч, газрын харилцааны албаны дарга Э.Болорчулуунтай утсаар холбогдлоо.

-Сайн байна уу. Шууд.мн сайтаас ярьж байна. Сүүлийн хэдэн өдөр тантай холбоотой асуудал хэвлэлээр гарах боллоо. Уг мэдээлэлд та ямар байр суурьтай байгаа вэ?

-Сайн байна уу. Миний талаар бичсэн мэдээллийг олж уншсан. Яагаад ийм ор үндэслэлгүй мэдээлэл гарах болсныг би хувьдаа гайхаж байна. Худал, гүтгэлэгийн чанартай мэдээлэл яваад байгаа учраас энэ мэдээллийг гаргаж байгаа газруудыг холбогдох байгууллагуудад нь шалгуулна.

ө

-Таныг тамгаа аваад зугатлаа гээд байгаа. Энэ үнэн үү?

-Нурууны гэмтлийн улмаас долоо хоног эмнэлэгт эмчилгээ хийлгэж байна. Гэтэл хэвлэлээр сар гаруй алга болсон гэж бичжээ. Надад тэр тамгийг аваад зугтаад байх шаардлага байхгүй. Тамга байдаг, байх ёстой газраа байж байгаа. Өөрөөр хэлбэл, миний ажлын өрөөнд байгаа.

ө

-Таны хөрөнгө орлогын мэдүүлэгт АТГ-аас шалгалт хийхэд, Зуун модны зуслан дахь 700 м2, Бурхантын аман дахь 10000 м2 болон эхнэр Д.Эрдэнэчимэгийн нэр дээр бүртгэлтэй Зуун модны зуслан дахь 700 м2, Тахилтын 700 м2, үйлчилгээний зориулалттай 450 м2 зэрэг таван байршил дахь газрыг мэдүүлэлгүй нуун дарагдуулсан байсан юм биш үү?

-Харин наад асуудлыг чинь гайхаад байгаа юм. Наад асуудлаар чинь Сүхбаатар дүүрэгт өргөдөл гаргаж миний нуун дарагдуулсан гээд байгаа хөрөнгийг гаргаад ир гэсэн, бас АТГ-т өргөдөл гаргаж өөрийгөө дахин шалгуулна. Шүүх байгууллагаар гэм буруутай нь тогтоогдоогүй байгаа хүмүүсийг гэм буруутай мэт бичээд байгаа хэвлэл мэдээллийнхэн та бүхэн гаргаж буй материалдаа бага ч болов цэнзүүртэй хандах хэрэгтэй байх. Шалгаж байна гэдэг чинь гэм буруутай нь тогтоогдсон юм биш шүү дээ. Энд бас нэг зүйл хэлье, ажил үүргээс чөлөөлөх албан бичиг над дээр ирээгүй байгаа.

ө

-АТГ-аас Нийслэлийн өмч, газрын харилцааны албаны дарга Ш.Төмөрбаатарт таныг ажлаас чөлөөлөх хүсэлтыг хоёр ч удаа илгээсэн гэх мэдээлэл байгаа. Энэ худлаа гэж үү?

-Нийслэлийн өмч, газрын харилцааны албаны дарга Ш.Төмөрбаатар намайг ажлаас чөлөөлөх албан бичиг гаргасан эсэхийг би мэдэхгүй. Магадгүй намайг ажлаас чөлөөлөх албан бичиг дүүргийн Засаг даргад ирсэн байхыг үгүйсгэхгүй. Надад бол ямар ч албан бичиг ирээгүй” хэмээн ярив.

Б.Одон