Европын холбоо Украины зүүн хязгаарт болж буй мөргөлдөөнд Оросын Засгийн газрыг буруутгаж хоригийнхоо хугацааг зургаан сараар сунгасан тухай “Ройтерс” агентлаг мэдээллээ. Европын холбоо өнгөрсөн оны есдүгээр сараас энэ оны гуравдугаар сар хүртэл оросын зарим салбарт хориг тавиад байсан юм. Зүүн хязгаарт дахин цус урсаж эхэлсэнтэй холбоотойгоор Европын холбооны гишүүн орнууд, хоригийнхоо хугацааг сунгах нь зөв хэмээн санал нэгджээ. Европын холбооны гишүүн орнууд Оросын бизнесмэнүүдэд виз олгохоос татгалзаж, дансуудыг нь царцаасан байна.

1

Голландын Гадаад хэргийн сайд Берт Кундерс “Орос, Украины хямралын гол буруутан. Оросоос болж хохирч буй Украины ард түмний төлөө Европын холбоо шийдвэртэй алхам хийх хэрэгтэй” гэж хэлжээ. Голланд улс ирэх сараас эхлэн Оросын бараа бүтээгдэхүүнийг газар нутагтаа зарахыг хориглосон байна.

1

Францын Гадаад хэргийн сайд Лоран Фабиус “Украины зүүн хязгаарт хяналтаа тогтоогоод буй салан тусгаарлагчдыг Орос зэвсгээр хангаж байгаа гэх нотлох баримт хангалтгүй байна” гэсэн байна. Тус улсын Ерөнхийлөгч Франсуа Олланд өнгөрсөн оны сүүлчээр ОХУ-ын Ерөнхийлөгч В.Путинтэй уулзсан билээ. Тэрбээр энэхүү уулзалтын дараа Европын холбоог Оросын эсрэг тавьсан хоригоо цуцлахыг уриалсан юм.

1

Б.Дэлгэрцэцэг