АНУ-ын удирдлагууд Украины зүүн хязгаарт болж буй мөргөлдөөн, тулалдаанд энгийн иргэд хохирохоос хамгаалж цэргийн тусламж үзүүлэх асуудлаар ярилцаж эхэлсэн тухай “www.dailymail.co.uk” мэдээллээ. Энэхүү саналыг Конгресс дэмжвэл Украины зүүн хязгаар руу зөвхөн хамгаалалтын цэргүүдээ илгээх гэнэ. Энэ долоо хоногийн эхээр АНУ-Украины Батлан хамгаалах яамны төлөөлөгчид уулзжээ. “Уулзалтын үеэр Украин АНУ-аас цэрэг болон зэвсгийн тусламж хүссэн” гэж Үндэсний аюулгүй байдлын зөвлөх Сюзан Райс мэдэгдсэн байна.   Пентагоны хэвлэлийн төлөөлөгч Элисса Смит “Зэр зэвсгийн тусламж үзүүлэх асуудал яриа хэлэлцээрийн шатанд явагдаж байна. Хоёр тал энэ асуудалд нухацтай хандаж буй. АНУ цэргээ Украины зүүн хязгаар луу илгээвэл Орос улстай харилцаа муудах эрсдэлтэй. Тиймээс энэ асуудал ганц улсынх бус олон улсын асуудал болоод байна” гэж ярьжээ. “Ерөнхийлөгч Барак Обама Украин цэрэг, зэвсгийн тусламж үзүүлэх сонирхолтой байгаа ч сөрөг хүчин Бүгд Найрамдах намынхны хүчтэй эсэргүүцэлтэй нүүр тулж буй” гэж “AFP”мэдээлжээ.   Б.Дэлгэрцэцэг