Монголын үр тариа эрхлэгчдийн “Газар тариалан” холбооныхон болон тариаланчид өнөөдөр өглөөний 09 цагаас эхлэн Чингисийн талбайд жагсаал хийгээд дөнгөж сая дуусч байна. Жагсаал цуглаан болгон өөрийн гэсэн онцлогтой байдаг. Тэгвэл тариаланчид энэ удаад техник хэрэгслээс гадна намрын ургацын буудайгаа авчирч бухимдлаа илэрхийлсэн юм.

g

Тэд “Нэгэн цагт монголчуудынхаа улаанбуудайн хэрэгцээг 100 хувь хангаж, гадагшаа экспортлох хэмжээнд тариалалт хийж явсан түүх бий. Зах зээл эхэлсэн үеэс энэ салбар уналтад орж, нийт хэрэгцээний 20 хон хувийг хангах хэмжээнд хүрчихээд байсан газар тариалангийн салбарыг бид өөд нь татаж байна. Өнөөдөр Монгол Улсын хэмжээнд 385 аж ахуйн нэгж газар тариалангийн салбарт ажиллаж, улаанбуудай тариалж, дотоодын хэрэгцээгээ хангахуйц хэмжээнд хүрчихээд байна. Гэтэл бидний, хүч хөдөлмөрийг үнэлэхгүй импортын буудайн асуудал яригдаад байгааг эсэргүүцэж байна” гэж байсан юм.

g

Тариаланчид өдрийн туршид ийнхүү талбайн урт хэсэгт эсэргүүцлээ илэрхийлж, жагсаалд ашигласан трактороо явуулж, чанга яригч, тайз зэргээ хурааж байх үеэр зарим иргэдийн гаргаж буй үйлдэл бүр ч ихээр бухимдуулж орхив. Юу гэвэл талбай дээр асгасан буудайг тор, шуудай  барьсан хүмүүс хүрч ирэн тал талаас нь ууталж, шуудайлан үүрээд явцгаах аж. Ямар зорилготой хэн ирээд хаашаа зөөж байгааг нь асуухад хэн ч хариулт өгсөнгүй.

g

Жагсаалд нь огт хамаагүй эдгээр иргэдийн үйлдлийг харсан тариаланчид “ Энэ хүмүүс ямар сонин юм бэ. Монголчууд ийм амиа бодсон хүмүүс учраас л хөгжихгүй байгаа юм. Зарим нь энд өдөржин гадаадаас буудай оруулж ирэхийг эсэргүүцээд зогсож байхад, санаа нь зовохгүй хүрч ирээд уутлаад явах юм. Энэ буудайг ямар их хөдөлмөр гаргаж, яаж тариалдаг гэдгийг мэдэх ч үгүй. Мэдэхийг ч хүсэхгүй биз. Үнэхээр юу ч гэж хэлэх ээ мэдэхгүй байна” гэж байлаа.

П.Наран