Иракийн хэт даврагч “Халифын вант улс” бүлэглэл дайтахад нас нь хэтэрхий хөгшин гэж 62 настай Алдбса гэх дайчнаа олны өмнө цаазалсан тухай “Ройтерс” агентлаг мэдээллээ.  Түүнийг олзны хүн болохоос нь урьдчилан сэргийлж ийнхүү цаазалсан тухай тус бүлэглэлийн тэргүүн Бакар аль Багдади мэдэгдсэн байна. Алдбса 40 гаруй тулаанд оролцож, Мосул хотноо байрлах Иракийн явган цэргийн ангид дэлбэрэлт зохион байгуулж байжээ. АНУ-ын Тагнуулын агентлаг дээрх бүлэглэлийг 21-30 мянган дайчинтай хэмээсэн бол НҮБ-ын Аюулгүй зөвлөл 120 мянгаас ч илүү дайчинтай гэсэн юм. Өнгөрөгч оны долоодугаар сараас хүчирхэгжиж эхэлсэн тус бүлэглэл долоогоос дээш насны хүүхдүүдийг тусгай сургуульд элсүүлж, хэт даврагч болгон бэлддэг байна. Энэ тухай тэдний барьцаанд байгаа Их Британийн сэтгүүлч Жон Кантли мэдэгдсэн билээ. Хэт даврагчдыг бэлддэг тусгай сургууль Иракт 80 орчим байдаг гэнэ.

Хэт даврагч болж буй хүүхдүүдийн ихэнх нь өөрсдийн хүсэлтээр тус бүлэглэлд элсдэг байна. Хэдхэн сарын өмнө зохион байгуулагдсан “Халифын вант улс” бүлэглэлийн анхдугаар чуулганы үеэр Багдади өөрсдийн хүсэлтээр элссэн хүмүүст алтан зоос өгөхөө мэдэгдсэн юм.

Б.Дэлгэрцэцэг