“Алтай Констракшн”-ы буруугаас болж хүн амиа алдав
“Алтай Констракшн”-ы буруугаас болж барилгын талбайд ажиллаж байсан хүн амиа алдлаа
Барилгын салбарын хөдөлмөр хамгаалал, аюулгүй ажиллагааны асуудал хэдэн хүн алтан амиараа хохирч байж сая цэгцрэхийг хэлэхэд хэцүү. Барилгын салбарт гарч байгаа үйлдвэрлэлийн ослын дийлэнх хувийг өндрөөс унаж бэртэх, нас барах тохиолдол эзэлж байгаа. Энэ нь хөдөлмөр хамгаалал, аюулгүй ажиллагааны асуудлыг дээд зэргээр мөрдөх шаардлага тулгарч байгааг харуулж буй хэрэг.
f
Тухайлбал, 2012 онд зөвхөн барилгын салбарт 161 гэмт хэрэг бүртгэгдсэнээс 26 буюу 70.2 хувь нь хүний амь нас хохирсон тохиолдол байгаа юм. Үүнээс хойш манайд барилгын салбар улам бүр эрчимтэй хөгжиж, олон ч хороолол, хотхон сүндэрлэн босохын зэрэгцээ тус салбартай холбоотой гэмт хэргийг гаралт улам бүр ихэсч байна.
f
Өнгөрсөн ням гарагт нийслэлийн Баянзүрх дүүргийн 26 дугаар хорооны нутаг дэвсгэр Саруул хотхоны захиалагч, ерөнхий гүйцэтгэгчээр ажиллаж буй “Алтай констракшн” ХХК-ийн В4 блокийн нэгдүгээр орцонд ажиллаж байсан 36 настай залуу амиа алдсан хэрэг гарлаа. Тодруулбал, энэ сарын 8-ны 13:50 цагийн үед тус барилгын лифтний хонгилд өргүүр ажиллуулж дээшээ есөн давхар руу тоосго зөөж байгаад өргүүрийн ган татлага /тросс/ тасарч, есөн давхарт тоосго буулгахаар зогсож байсан ажилтан Б нь осолдож түргэн тусламж ирэх хугацаанд нас барсан байна. Талийгаач тухайн үед өрлөгийн ажил хийж байсан ч тоосго буулгах ажилтан нь ирээгүй байсан тул оронд нь тоосго буулгахаар очоод амиа алдсан аж.
f
“Алтай констракшн”-ы үйл ажиллагааг зогсоожээ
f Уг хэргийн талаар ЦЕГ-аас тодруулах гэсэн боловч хоногийн мэдээнд тийм мэдээлэл огт ирээгүй гэсэн юм. Тиймээс хэргийн газарт юу болсон болон “Алтай констракшн”-ынхан хөдөлмөр хамгаалал, аюулгүй ажиллагааг хэрхэн бүрдүүлсэн байсан эсэхийг нийслэлийн Мэргэжлийн хяналтын газраас тодруулсан юм.
f
Ослын мэдээллийг өнгөрсөн ням гарагийн 15:21 цагт Баянзүрх дүүргийн хөдөлмөрийн аюулгүй байдлын хяналтын улсын байцаагч Д.Хорлоогоос авч, 15:50 минутад ослын газарт НМХГ-ын Санхүү, хөдөлмөр, нийгмийн хамгааллын хяналтын хэлтсийн дарга Д.Энхжаргал, хөдөлмөрийн аюулгүй байдлын хяналтын улсын ахлах байцаагч Ц.Энхсайхан, Д.Алтанцэцэг, хөдөлмөрийн аюулгүй байдлын хяналтын улсын байцаагч Ц.Оюунчимэг, барилгын техник, өргөх механизмын хяналтын улсын байцаагч Г.Эрдэнэхүү нар ажилласан байна.
f
Мэргэжлийн хяналтынхныг хэргийн газарт очиход, Баянзүрх дүүргийн цагдаагийн хоёрдугаар хэлтсийн мөрдөн байцаагчид, Нийслэлийн прокурорын газрын ажилтнууд осол гарсан газрыг хамгаалалтад авч, цогцсыг есөн давхарт тоосго налуулан хэвтүүлсэн байдалтай байжээ.
f
Улмаар “Алтай констракшн” ХХК-ийн ерөнхий инженер Д.Бямбаням, хөдөлмөрийн аюулгүй байдлын инженер Д.Сонинбаяр, талбайн инженер н.Мөнхсүх, бригадын дарга Д.Гансүх, дохиочин н.Сугарсүрэн нарыг байлцуулан хэргийн газарт шалгалт хийж, илэрсэн зөрчлүүдийг арилгах хүртэл үйл ажиллагааг нь түр зогсоох арга хэмжээ авч ажилласан юм байна.
f
Л.Эрдэнэчулуун /НМХГ-ын дарга/: “Алтай констракшн” ХХК дөрвөн ноцтой зөрчил гаргасан
f “Ослын газар дээр манайхаас ажлын хэсэг очиж, ажилласан. Урьдчилсан байдлаар “Алтай констракшн” ХХК дөрвөн ноцтой зөрчил гаргасан гэдгийг тогтоогоод байгаа. Тодруулбал, Барилгын тухай хуулийн 14 дүгээр зүйлийн 14.1 дэхь заалт болох барилга байгууламжийн зураг төсөл, барилгын ажил, угсралт, засвар үйлчилгээг тусгай зөвшөөрлийн үндсэн дээр эрхлэх, “Барилга угсралтын үйл ажиллагаанд хөдөлмөрийн аюулгүй байдал, эрүүл ахуйн шаардлага хангах асуудлыг зохицуулах нийтлэг журам”-ын есдүгээр зүйлийн 9.2.2 дахь заалт болох Тусгай зөвшөөрөлгүй аж ахуйн нэгж, байгууллага болон иргэнтэй ажил гүйцэтгэх гэрээ байгуулахыг хориглоно гэсэн заалтуудыг зөрчиж, захиалагч, гүйцэтгэгч “Алтай констракшн” ХХК, иргэнтэй "Саруул хотхон” хорооллын В4 блокын дотор өрлөгийн ажил хийх тухай” гэрээ байгуулж, барилгын ажил хийсэн байсан.
f
Түүнчлэн журмын есдүгээр зүйлийн 9.2.5 дахь заалт болох гэрэлтүүлэггүй газар ажил гүйцэтгэхийг хориглоно, Барилгын үйлдвэрлэлд дагаж мөрдөх хөдөлмөр хамгаалал, аюулгүй ажиллагааны дүрмийн ил залгай газар буюу халаалтгүй байранд ажиллагсадын ажлын байрны агаарын температур 10 градусаас доош болсон үед дулаацах байраар хангаж өгнө. Барилга угсралтын ажилд мөрдөх хөдөлмөрийн аюулгүй ажиллагааны үлгэрчилсэн заавар болох хүйтний улиралд гадаа ажиллаж байгаа ажилтан нь хоёр цаг тутамд 5-10 минутын завсарлагатайгаар дулаацаж ажлаа явуулах шаардлагатай.
f
Ажиллагсад нь хүйтний улирлын хувцсаа өмссөн байвал зохино зэргийг зөрчиж, ажилтныг гадна агаарын температур 10 градусаас доош үед халаалтгүй ажлын байранд ажлын нөхцөлд тохирсон дулаан хувцас, толгойн хамгаалах хэрэгсэлгүй ажиллуулсан байсан. Өөрөөр хэлбэл, нас барсан хүн дулаан хувцасгүй байсан гэсэн үг.
f
Мөн хөдөлмөрийн аюулгүй ажиллагааны зааварчилгаа аваагүй, сургалтад хамрагдаагүй ажилтанг ажиллуулсан, өргөх, зөөх, тээвэрлэх хэрэгсэлд засвар үйлчилгээ, тохируулгыг мэргэжлийн байгууллагаар хийлгэж, дүгнэлт гаргаж баталгаажуулсан техникийн магадлагаа, бичиг баримт, лифтний хонгилд байрлуулсан өргүүрийн угсралтын зураг, ашиглалтын паспорт, холбогдох бичиг баримтууд байгаагүй. Тиймээс эдгээр зөрчлүүдийг арилгах хүртэл үйл ажиллагааг нь түр зогсоосон” гэв.
f
Үүнээс үзэхэд, “Алтай констракшн” ХХК нь хөдөлмөрийн аюулгүй байдал, эрүүл ахуйн тухай хууль буюу өөрийн ажиллагсадын аюулгүй, эрүүл ажиллах нөхцлийг огтоос бүрдүүлдэггүй гэсэн үг. Хөдөлмөр хамгаалал аюулгүй хамгааллын үйл ажиллагаанд гаргах ёстой багахан хэмжээний зардлыг гаргаагүйгээс болоод ийнхүү нэг залуу хорвоогоос явлаа.
f
Гүйцэтгэгч байгууллага өдөр тутмын дотоодын хяналтыг хийн хөдөлмөр хамгааллын ажилтан томилж ажилуулах асуудал анхаарахгүй бол цаашид хэдэн ч хүн алтан амиараа хохирох юм билээ. “Алтай констракшн” ХХК манайдаа л томоохон тооцогдох барилгын компаниудын нэг учир олон хүний амиар “тоглох” магадлал нь ч тэр хэрээр өснө гэсэн үг. Тиймээс итгэлээр жигүүрлэж, сэтгэлээр цогцлоосон, их бүтээн байгуулалтуудаа аюулгүй, эрүүл орчинд хийвэл яаж байна “Алтай констракшн”-ныхаан.
f
Ж.Отгон
f
Эх сурвалж: www.mminfo.mn
СЭТГЭГДЭЛ БИЧИХ