Говь-алтай аймгийн Засаг дарга О.Амгаланбаатар өөрийн зураг бүхий “Эрүүл ус” гэх цэвэр ус гаргажээ. Учир нь тус аймаг усны хомсдолд ороод байгаа аж.

Тодруулбал, тус аймгийн Алтай суманд алтны уурхайнууд олноор олборлолт явуулснаас үүдэн таван жилийн өмнөөс булаг шандууд ширгэжээ. Албаны хүмүүсын тайлбарлаж буйгаар тус сумын хэмжээнд ганц, хоёрхон хэдэн худаг ажилладаг бөгөөд нэг өрхийн 7 хоногийн усны хэрэгцээ 25 литрээр хэмжигдэх болжээ. Мөн Говь-Алтай аймгийн 13 сум өнөөдрийн байдлаар усны хомсдолд ороод байгааг Усны үндэсний төвөөс мэдээлж байна. Тухайлбал, Алтай, Баян-Уул, Тонхил, Бигэр гэгчлэн тус аймгийн уул уурхайн баялаг ихтэй, судлагдсан ордуудтай сумдын иргэд усны хомсдолоос гадна хүнсний наад захын шаардлага хангахгүй ус хэрэглэсээр олон жилийн нүүрийг үзэж байгаа аж.

Зургаан суманд ундны усанд агуулагдах хлор, магни байх ёстой хэвийн хэмжээнээс хэд дахин их бөгөөд үүнийг цэвэршүүлэх ямар ч технологи байдаггүй байна. Мөн аймгийн төвийн айл өрхүүдийн хэрэглэж байгаа усны кальци, магнийн харьцаа алдагдсан, хлор байх ёстой хэмжээнээс дэндүү их байгаа нь тус аймагт шар өвчин байнга дэгддэг, ходоод, гэдэс, дотрын өвчлөлөөр тэргүүлж байгаагаас нь харж болох аж.

 Иймд тус аймгийн Засаг дарга өөрийн зураг бүхий “Эрүүл ус” гэх цэвэр усыг борлуулалтанд оруулаад байгаа гэнэ.

Б.Одон