УИХ-ын чуулганы нэгдсэн хуралдаан үргэлжилж  байна.  Хуралдаанаар Төрийн өмчийг 2015-2016 онд хувьчлах, өөрчлөн байгуулах үндсэн чиглэл батлах тухай  УИХ-ын тогтоолын төслийг хэлэлцэхийг  шийдлээ. Гишүүд хэлэлцэж байгаа асуудалтай холбогдуулан асуулт тавьж, үг хэлсэн юм.

ө

Тухайлбал гишүүн С.Дэмбэрэл “Монгол Улсад явагдсан хувьчлалтын гол зорилго нь үр ашгийг дээшлүүлэх талдаа явж ирсэн. Өмч хувьчлал гэдгийг өргөн утгаар нь ойлгодог. Хувьчлалыг өмнөх, дунд, дараах гэж гурав хуваадаг. Хувьчлалын гол аргуудыг шат шатанд нь тодорхойлон явуулдаг. Төр нийтийг төлөөлдөг учир төрийн өмчит компанийг хуулинд оруулсан. Хувьчлал нь өөрөө их эмзэг. Тиймээс үүнийг янз янзаар хардан сэрдэх зүйл их гарна. Бусдад зөв тайлбар өгөхийн тулд хүмүүс асууж байгаа юм. Тийм учраас цаашдаа энэ асуудлыг дэмжээд,  бүх салбарт ойлголтыг нэгтгэх хэрэгтэй гэж байлаа. Харин УИХ-ын гишүүн Д.Сарангэрэл “Мэдээлэл  холбооны салбарыг хувьчлахыг дэмжихгүй. Энэ салбарыг төрийн мэдэлд байлгах нь зүйтэй. Нөгөө талаасаа хувьчлах объектуудын жагсаалтыг харж байхад ялгавартай хандах зүйл харагдаж байна. Хэрвээ объект бүр дээр яривал ухаалаг хандах ёстой. Хэлэлцэх эсэхийг нь дэмжээд хаврын чуулганаар оруулъя гэж байгаа бол дэмжинэ гэлээ.

ө

Гишүүд хувьчлалын асуудлыг хэлэлцэхийг дэмжихээд хаврын чуулганаар үргэлжлүүлье гэж байсан юм. Мөн гишүүн Г.Уянга “Хоморголон хувьчилж болохгүй. Үүнийг хаврын чуулганаар нухацтай хэлэлцэх ёстой. Салбар болгон дээрээ маш болгоомжтой хандах хэрэгтэй. Ямар ч мэдээлэлгүйгээр хувьчлал орж ирж байна. Тухайн хамт олонд нь хувьчилна гэж байна. Тиймээс тухайн хамт олонд 5-10 хувь нь ямар ашигтай тусах вэ гэдгийг бодох хэрэгтэй”  гэж байлаа. Ингээд    Төрийн өмчийг 2015-2016 онд хувьчлах, өөрчлөн байгуулах үндсэн чиглэл батлах тухай  УИХ-ын тогтоолын төслийг хэлэлцэх нь зүйтэй гэсэн санал хураалт явуулахад гишүүдийн олонхи нь дэмжив.

ө

Н.Энх