Жил бүрийн Хаврын тэргүүн сарын Шинийн 8-ны билэгт сайн өдөр монгол эрчүүд маань  Төрийн тахилгат Бурхан халдун уулнаа гарч, өглөөн нарыг харах ёслолоор хийморь, омогшил, бат оршихуйн хүслээ сэргээдэг уламжлалтай.  Тэгвэл сүүлийн жилүүдэд монгол эрчүүд маань Дорнод аймгийн Халхгол сумын нутагт байрлах Их бурхант чулуун бурханы цогцолборыг Шинийн 15-ны дотор зорин очиж харах ёслол үйлддэг болсон аж. Эх орны маань хамгийн эхний наран ургах зүг болсон энэ нутагт улс төр, бизнесийнхэн, соёл урлагийнхан ихэвчлэн очиж аз хийморио даатгаж, тэр жилдээ хийморь өөдөө ажил үйлс бүтэмжтэй сайхан явдаг хэмээн ярилцах болсон байна.

as

Дорнод Монголын түүх, соёлын томоохон дурсгалуудын нэг "Их бурхант” чулуун бурханы цогцолбор дурсгалын талаар багахан түүх сонирхуулья. Халхын Сэцэн хан аймгийн жүн ван Бат-Очирын Тогтохтөрийн /То ван 1797-1868/ санаачлага удирдлагаар 1859-1864 онд бүтээсэн дурсгал "Их шүтээн”, "Их бурхант” хэмээн олноо алдаршжээ. Энэ дурсгалыг найман аюулаас аврах Арьяабал бурханч гэдэг байна. Түүний гарт нь арслан, заан, могой, гал, ус, гав гинж, хүний бодол санаа зэрэг найман утгыг агуулсан билэгдэл атгаастай байдаг. Их Бурханыг Монгол улсын дорнод хил хязгаарыг аюул гамшигаас хамгаалахын билгэдэл болгон барьсан гэж олны дунд яригддаг боловч То ван ард олон шүтлэг бишрэлээс шалтгаалж асар их эд хөрөнгө түвд, энэтхэг, хятад руу урсаж байгааг гярхай ажиглаж энэ бүх буяныг нутаг орондоо тогтоох зорилгоор барьжээ гэж тайлбарладаг аж.

sa

Их бурханыг бүтээхэд мянган үхэр тэрэг хөдөлгөж долоон жилийн турш барьсан гэдэг. Тухайн үедээ өрх бүрээс нэг үхэр, айл болгоноос таван лан мөнгө гаргасан гэсэн хууч яриа байдаг. Найман аюулаас аврагч Жанрайсиг бурханы дүр эл шүтээнийг То ван болон Сэцэн хан аймгийн хошуу ноёд, ихэс дээдэс чулуугаар хэвтээ байдлаар бүтээн залахаар шийдэж, Халх голын баруун 35 градусын налуу энгэрт 90 тохой буюу 30 метр уг бурханыг хоёр бага хүрээн дотор цогцлуулжээ. Их бурханыг тойруулан чулуугаар урласан 20 гаруй жижиг бурханы дүр бүтээсэн аж. Их Бурхантын талаар академич Ш.Нацагдорж, Х.Пэрлээ болон Оросын эрдэмтэн А.П.Окладников, В.Казакевич нар зохиол бүтээлдээ дурьдаж байжээ. А.П.Окладников 1949 онд Халх голын сав нутгаар судалгааны ажлаар явахдаа "Их бурхант”-ыг үзээд гайхан биширч энэ дурсгал бол уг газар нутагт оршин тогтнож байсан хүчирхэг гүрний бүтээл боловуу. Энэ нь X-XI зуунд холбогдох байх хэмээн үзсэнийг нэрт эрдэмтэн археологич Х.Пэрлээ залруулж XIX зуунд бүтээгдсэн болохыг баримтаар нотолжээ.

a

Сонирхуулахад, Түүх дурсгалын соёлын өвийг сэргээн засварлах үндэсний төвөөс энэхүү “Их Бурхант” цогцолборыг сэргээн засварлах ажлыг өнгөрсөн онд хийж дууссан юм.

a

П.Наран