“Евро-Азийн нутгаар морьтон монгол залуус” морин аялал энэ оны долдугаар сараас эхлэх аж. Уг аялалыг Монголын Залуучуудын холбоо зохион байгуулж буй бөгөөд аялалаар улс орныхоо түүх соёл, зан заншил, байгаль, угсаатны онцлог, язгуур урлагаа сурталчлан үүгээр дамжуулан монгол орныг дэлхийд таниулан сурталчлах, ингэснээр жуулчдын тоог нэмэгдүүлэхийн зэрэгцээ дэлхийд нэн ховордсон мазайлайг дэлхийд таниулах, хамгаалах, монгол хүний тэсвэр, тэвчээр, монгол морины хүч чадал, туулах чадварыг судлах зэрэг олон зүйлийг багтаасан гэнэ.

Аялалд оролцогчид өөрийн орны хөгжил, дэвшлийг Евро-Азийн бусад орнуудтай харьцуулах, аялсан улс орныхоо Залуучуудын байгууллагуудтай харилцаа холбоо тогтоох, аялж буй газар нутгийн онцлог, соёл, зан заншлын тухай телевизийн нэвтрүүлэг, фото зургийн цомог, аян замын тэмдэглэл, түүхэн эх сурвалжийн тухай судалгааг газар орны нөхцөл байдалтай холбон бас харьцуулан судлах ажлыг хийх ажээ.

Багийн ахлагчаар МЗХ-ны аялал жуулчлалын хөгжлийн төвийн дарга Э.Хишигбаяр явах бол багийн гишүүдээр судлаач Лу.Батнасан судлаач А.Очирхуяг гэсэн үндсэн бүрэлдэхүүнтэй байх гэнэ.

Б.Дэжид