Гацууртын орд ашиглахыг зөвшөөрөхгүй, Урт нэртэй хуульд өөрчлөлт оруулахын эсэргүүцэн  "Босоо хөх Монгол” бүлгэмийн гишүүд Хэлмэгдэгсдийн хөшөөний дэргэд өлсгөлөн зарлаад байгаа билээ.Тэд өнөөдөр 18:00 цаг гэхэд Монгол Улсын Ерөнхийлөгч ямар нэгэн хариу өгөхгүй бол хуурай өлсгөлөнд шилжих болно гэдгээ мэдэгдлээ.

a

Тэдний өлсгөлөн сар шинийн баярын өдрүүдэд ч үргэлжилсэн бөгөөд Босоо хөх Монгол бүлгэм, Сэлэнгэ аймгийн иргэд хамтран "Ноён уулаа аваръя" хөдөлгөөнийг өрнүүлэн 12 өдрийн турш өлсгөлөн зарлаад байгаа юм. Тэд Ерөнхийлөгч, Ерөнхий сайд, УИХ-ын даргад шаардлага хүргүүлсэн ч хариу ирэхгүй байгаа тул өлсгөлөнгөө үргэлжлүүлсээр байгаа юм. УИХ-ын чуулганы хаалтын өдөр  Урт нэртэй хуулинд өөрчлөлт оруулахыг гишүүд дэмжсэнээр  уг хуулийн хүрээнд хамгаалагдаж байсан газар нутагт уул уурхай, ашигт малтмалын үйл ажиллагаа хийх эрх нээгдсэн билээ. Тиймээс өлсгөлөн зарлаж буй иргэдийн найм нь өнөөдрөөс эхлэн тэмцлийн дараагийн хэлбэр болох хуурай өлсгөлөн зарлахаа ийнхүү мэдэгдлээ.

sa

Босоо хөх Монгол бүлгэмийн удирдах зөвлөлийн гишүүн Э.Төмөрхуяг: “Иргэд сар шинийн баяраа хийж байхад бид өлсөөд хэвтэж байлаа. Ерөнхийлөгч үнэхээр л ард түмнийхээ төлөө ажилладаг юм бол бидэнтэй гарч  ирээд уулзчихаж болно. Гэтэл тоосон шинжгүй айл хэсээд баярлаад явж байна. Урд шөнө цагдаагийн албан хаагчид ирж тараахыг оролдлоо. Бас бидний ашиглаж байгаа интернэт, твиттерийг хакердаж гацаалаа. Ингэлээ гээд бид бууж өгөхгүй цаашид тэмцсээр байх болно. Хэвлэл мэдээллийн хэрэгслээр биднийг сар шинээр тохиролцоо хийгээд өлсгөлөнгөө зогсоосон гэж худал мэдээлэлэ цацаж байгаад харамсаж байна. Бас твиттер, фейсбүүкээр биднийг мөнгөний төлөө ингэж өлсгөлөн зарласан гэж ташаа мэдээлэл тарааж, иргэдэд буруу ойлголт өгөөд байна. Бид хэн нэгний захиасаар ингэж яваагүй. Үнэхээр хэн нэгнээс бид мөнгө авч байгаа бол тэрнийг баримтаар ил гаргаад өг. Үнэхээр ард түмнийхээ төлөө дуу хоолойгоо өргөж, өөрсдийн биеэр биет үйлдлээр ингэж тэмцэж байгаа хүмүүсийг ингэж дарамтлах хэрэг байхгүй шүү. Тийм асуудал огт байхгүй” гэсэн юм.

a

Сэлэнгэ аймгийн Мандал сумын иргэн, “Ноён уулаа аварья” хөдөлгөөний тэргүүн:  О.Цэрэннадмид “Өдгөө би 60 гаруй настай.Бие муудаж түргэн дуудсан ч өлсгөлөнгөө үргэлжлүүлэхээр ирээд байна. Хуурай өлсгөлөн зарлана гэдэг аюултай. Гэхдээ яахав Ноён уулыг хэдэн хүний амиар ухуулахыг харна. Хэрэв хүний амь эрсдэх юм бол эрх мэдэлтнүүдээр төлүүлэх болно. Энэ ордонд байгаа нөхдүүдээс хэвлэл мэдээллийг сонсож байгаа монгол цустай, Чингисийн хөх тамгатай, эх оронч, ард түмнээ боддог гишүүн байдаг юм бол бид нартай нэгдэх хэрэгтэй. Бидэнтэй нэгд гэж хэлмээр байна. Би эмнэлэгт хоёр хоноод гараад ирсэн, өлсгөлөнгөө тавиагүй байгаа. Гадна дотны байгаль орчны, хүний эрхийн  байгууллагад хандана” гэлээ.

a

"Босоо Хөх Монгол" бүлгэмийн УЗ-ийн гишүүн Х.Бээжин: “Өлсгөлөн 13 дахь өдрөө үргэлжилж байна. Өлсгөлөн зогсоогүй үргэлжилсээр байна. Өнөөдөр хуурай өлсгөлөнд шилжиж байгаагаа албан ёсоор мэдэгдэж байна. Өнгөрсөн шөнө 02 цагийн үед хүчний байгууллагынхан биднийг хүчээр тараахыг оролдсон ч иргэдийн хамгаалалттай тулгарсан. Мөргөлдөөн болно гэж бодсон уу яасан үүрээр тэгсгээд яваад өгсөн. Чингэлтэй дүүргийн алхах цагдаа, дүүргийн гадаа, бидний энд тэнд булангуудад цагдаа зогсож байсан. Суулт эхэлж, өлсгөлөнд шилжсэнээс хойш 13 өдөр 288 цаг болж байна. Өлсгөлөн зарлаж байгаа хүмүүсийн биеийн байдал сайн гэж хэлэхэд хэцүү. Гэхдээ эмч үзээд гайгүй байна гэсэн. Өнөөдөр ажлын өдөр эхэлж байна. Өнөөдөр Монгол улсын Ерөнхийлөгч ямар нэгэн хариу өгнө гэж итгэж байна.

Бид урт нэртэй хуульд өөрчлөлт оруулахгүй, Ноён уулыг ухуулахгүй гэсэн хоёрхон шаардлага хүргүүлсэн шүү дээ. Бие нь муудаад эмнэлэгт сувилуулсан хүн маань өөрөө бүцаад гараад ирсэн байна. Сар шинийн өдрүүдэд биднийг тарчихсан гэж ойлгосон байна. Бид байгаа гэдгээ мэдрүүлэх гэж хэвлэлийн хурал хийж байна. Ирэх бүтэн сайн өдөр Чингисийн талбай дээр тайван цуглаан хийнэ. Дуучид, урлагийнхан эх орны сэдэвтэй дуу дуулна. Иргэдтэй санал бодлоо солилцоно. Ямар нэгэн жагсаал хийхгүй. Ард иргэд нэгдээсэй гэж хүсэж байна.

a

a

П.Наран