Цагдаагийн байгууллагад хулгайн хэргээр шалгагдаж байсан П.Батсүх гэгч, 2015 оны нэгдүгээр сард мөрдөн байцаагчийнхаа өрөөний цонхоор орж, сейфийг эвдэн өөрт холбогдох 22 хавтас хэргийг хулгайлж, шатааж устгасан хэрэг үйлдсэн тухай өмнө нь мэдээлж байсан. Тэгвэл түүний хавтаст хэрэг хулгайлж, устгасан хэргийг өчигдөр шүүхээр хэлэлцэж Монгол Улсын Эрүүгийн хуулийн 234.2, 245.1-д заасан зүйлээр яллаж, гурван жилийн хорих ялыг чанга дэглэмтэй хорих ангид эдлүүлэхээр шийдвэрлэсэн байна.

п

Алдагдсан хэргийг цагдаагийн байгууллага шуурхай ажиллан дахин бүрдүүлж, прокурорт шилжүүлжээ. Одоо П.Батсүхэд холбогдох хулгайн үндсэн хэрэг нь Дүүргийн хоёрдугаар прокурорын газрын хяналтанд байгаа бөгөөд Дүүргийн хоёрдугаар шүүхээр хэлэлцэж ял оногдуулах юм байна. Ингэснээр гэмт этгээд нь дээрх гурван жилийн ял дээрээ Монгол Улсын Эрүүгийн хуулийн 145.4-д зааснаар 15 жил хорих ялаар нэмж шийтгүүлэх юм байна. Тэрбээр ялаа хасах гээд өөртөө ял нэмсэндээ харамсаж байгаагаа шүүх хуралдааны үеэр мэдүүлжээ.

П.Батсүх 12 аймаг, есөн дүүрэг дамжин хулгай хийж, 44 үйлдлээр бусдад 300,0 гаруй сая төгрөгийн хохирол учруулж, хохирлоо огт барагдуулаагүй байгаа учраас хуулийн хариуцлагаас мултрахаар санаархаж ийнхүү өөрт холбогдох хэргээ хулгайлж шатаасан нь харин ч эсрэгээр болж өөртөө ял нэмсэн байна.

б

Б.Хүлэг