Индонезийн удирдлагууд хар тамхины хэргээр ял эдэлж буй Австралийн хоёр иргэнийг цаазлахаар болсноо албан ёсоор мэдэгдсэн тухай “Ройтерс” агентлаг мэдээллээ. Тус улсын Ерөнхийлөгч Жоко Видодо “Индонезийн дотоод асуудалд ямар ч гүрэн оролцож, гар дүрэхийг би зөвшөөрөхгүй. Австралийн шахалтаас болж хар тамхины хэргээр ял эдэлж буй иргэдийг суллахгүй гэдгээ дахин мэдэгдье” гэж хэлжээ. 31 настай Андрю Чан, 33 настай Мюран Сукумаран нар хар тамхи хилээр давуулах гэж байхдаа цагдаагийнханд баригдсан юм. Тэдний шүүх хурал өнгөрсөн сарын 1-нд Жакарта хотноо болсон бөгөөд шүүх тэднийг буруутай хэмээн үзэж, ялын дээд хэмжээ оноосон билээ.

1

Австралийн иргэдийг өчигдөр Жакарта хотоос Бали руу шилжүүлсэн байна. Цаазын ялыг энэ сарын сүүлээр гүйцэтгэхээр болсон гэж Жакарта хотноо байрлах Австралийн Элчин сайдын яамны төлөөлөгч мэдэгджээ. Австралийн Ерөнхий сайд Тони Эббот иргэдийг нь цаазалсан тохиолдолд тус улсаас элчин сайдын яамаа эргүүлэн татахаас гадна 2012 онд буцалтгүй тусламжаар олгосон нэг тэрбум ам.долларыг эргүүлэн өгөхийг шаардсан юм. Тэрбээр “Индонезийн тал ирээдүйд Австрали улстай найрсаг харилцаатай байхыг хүсч буй бол Андрю Чан, Мюран Сукумаран нарт оноосон ялаа хүчингүй болго” гэж хэлжээ.

1

Б.Дэлгэрцэцэг