“Гэрлэх ёслолын ордон”-г “ашиггүй ажиллалаа” гэсэн шалтгаанаар хувьчлах саналыг нийслэлийн Өмчийн харилцааны газрын дарга Ш.Төмөрбаатар гаргаж, НИТХ-ын хуралдаанаар хэлэлцүүлжээ. Учир нь тус байгууллага өнгөрөгсөн 2014 оны байдлаар 27 ажилтантай, 1.693.254 төгрөгийн хөрөнгөтэй хэмээн санхүүгийн тайландаа тусгасан байна.

1976 оноос үйл ажиллагаагаа явуулж эхэлсэн энэ байгууллага нийслэлийн төсөвт тодорхой хэмжээгээр  дэмжлэг үзүүлдэг бөгөөд нийслэлийн хэмжээнд ганцхан байдаг энэ газрыг өмчлөхийг олон хүн дэмжихгүй байгаа бололтой. Энэ тухай өчигдөр НИТХ-аар хэлэлцсэн бөгөөд “Барилгын газарт шунан улмаар нурааж дахин өндөр барилга бариулах атгаг санаа байж магад, ганц жил ашиггүй ажиллаа гээд шууд хувьчилна гэх санал оруулж ирж байгааг гайхаж байна” хэмээн зарим гишүүд саналаа хэлжээ.

 Ямартай ч “Гэрлэх ёслолын ордон”-г хувьчлах эсэхийг энэ сарын 13-ны НИТХ-ын тэргүүлэгчдийн нэгдсэн хуралдаанаар хэлэлцэн эцэслэн шийдэх юм.

Б.Дэжид