Өнгөрсөн оны наймдугаар сард Фергюсон хотын цагдаагийн офицер Даррен Уилсон 18 настай өнгөт арьст Майкл Браун хүүг зургаан удаа буудаж, улмаар аминд нь хүрсэн билээ. Энэхүү үйл явдлын дараа АНУ-ын 80 гаруй хот, мужид эсэргүүцлийн жагсаал зохион байгуулж, Засгийн газар болон Ерөнхийлөгчөө өнгөт арьст иргэдээ хамгаалахыг хүсч, хүүгийн аминд хүрсэн цагдааг хуулийн дагуу шийтгэхийг шаардсан юм. Өнгөрсөн баасан гаригт Даррен Уилсоныг аргагүй эрхэнд галт зэвсэг ашигласан, хэрэг үүсгэх үндэслэл байхгүй гэж Хууль зүйн яамнаас мэдэгджээ.

1

Энэхүү шийдвэрийн дараа хүүгийн гэр бүл болон дэмжигчид дахин цугларч, Фергюсон хотын захиргааны байрны өмнө суулт зарласан байна. Брауны аав Бобби Браун  “Бурхан гэж байдаг юм уу. Хүү минь бусдын гарт амиа алдсан. Гэтэл хүүг минь өөрийн хүсэлтээр амиа алдсан мэт шүүх болон яамнаас үзлээ. Насанд хүрээгүй хүүхдийн аминд хүрч, олон өнгөт арьстай хүнийг айдаст автуулсан Даррен Уилсон эрх чөлөөтэй боллоо. Үнэхээр харамсалтай байна” гэж “www.csmonitor.com” сайтад ярьжээ.

Цагдаагийнхныг жагсагчдын эсрэг хүч хэрэглэхгүй байхыг Ерөнхийлөгч Барак Обама тушаасан байна. Тэрбээр “Би эцэг хүн. Тиймээс та бүхний зовлонг ойлгож байна. Үнэнийг хэлэхэд Фергюсон хотноо дахин жагсаал цуглаан болоосой гэж хүсэхгүй байна” гэжээ.

1

Б.Дэлгэрцэцэг