Пакистан улс хэт даврагчид болон террорист халдлагуудтай холбоотойгоор цаазын ялыг сэргээсэн тухай НҮБ-ын Хүний эрхийн холбооноос мэдээлснийг “Ройтерс” агентлаг уламжлав. Тус улс 2008 оноос эхлэн цаазын ял гүйцэтгэхээ зогсоосон билээ. Хууль ирэх сараас эхлэн хүчин төгөлдөр хэрэгжиж эхэлнэ гэж тус улсын Ерөнхий сайд Наваз Шариф мэдэгджээ. Тус улсын хэмжээнд 2008 оноос эхлэн 8000 гаруй хүн цаазын ялнаас мултарч, бүх насаараа хоригдох ялаар шийтгүүлжээ. Тэдний ихэнх нь халдлага, хүний аминд хүрснээс гадна хүчингийн хэргээр ял эдэлж байгаа юм. 2008 оноос өмнө дээрх хэргээр баригдсан хүмүүсийг шууд цаазаар авдаг байсан ч НҮБ-ын шахалтаас болж, хуулиндаа өөрчлөлт оруулж байжээ.

Өнгөрсөн оны сүүлээр “Талибан” бүлэглэлийн дайчид Пешавар мужид байрлах дунд сургуулийг барьцаалж, 134 хүүхдийн аминд хүрсэн билээ. Энэхүү хэрэгтэй холбоотой 20 хүнийг баривчилсан юм. “Хууль хэрэгжиж эхэлсний дараа сургуульд халдаж, олон хүүхдийн аминд хүрсэн этгээдүүдийг цаазаар авах болно” гэж сайд мэдэгдлийнхээ үеэр дурьджээ.

Б.Дэлгэрцэцэг