Улаанбаатар хотын Замын цагдаагийн газрын МШУЗХ-т өчигдөр нийт 274 дуудлага мэдээ мэдээлэл хүлээн авснаас зам тээврийн ослын 182 дуудлага бүртгэгдсэн байна. Үүнээс хөдөлгөөний аюулгүй байдлын албан журмын эсрэг гэмт хэрэг долоо бүртгэгдэж, долоон хүн хүнд хөнгөн гэмтжээ.

БЗД-ийн нутаг Энхтайваны өргөн чөлөө Кино үйлдвэрийн автобусны буудалд Эрдэм транс ХХК-ны Х.Аеро Сити-540 маркын автобусны жолооч М нь зорчигч 52 настай эрэгтэй Ч-г унагаж гэмтээжээ. Монгол Улсын Замын хөдөлгөөний дүрмийн 21.2 “жолооч нь тээврийн хэрэгслээ гүйцэт зогсоосны дараа зорчигчийг буулгах буюу суулгах, хаалга гүйцэд хаасны дараа хөдөлгөөнөө эхлэх үүрэгтэй гэж “ заасан байдаг. Гэтэл нийтийн тээврийн үйлчилгээнд явдаг автобусны жолооч нар нь зорчигчоо бууж, сууж амжаагүй байтал хөдлөөд явдаг, дуртай газраа хүн буулгаж суулгадаг, хурд хэтрүүлдэг, урсгал сөрдөг, бүрэн бус тээврийн хэрэгсэлтэй, согтууруулах ундааны зүйл хэрэглэсэн үедээ тээврийн хэрэгсэл жолоодож хөдөлгөөнд оролцох зэрэг зөрчлийг гаргаснаас болж зам тээврийн осолд нийтийн тээврийн автобусны жолооч нар ихээр холбогддог аж.

Нийтийн тээврийн үйлчилгээнд явж буй автобусны жолооч нь өөрөөсөө гадна олон хүний амь нас эрүүл мэндийг хариуцаж явдаг учир замын хөдөлгөөний хууль, дүрмийг биелүүлэн аюулгүй байдлыг хангаж, хамгийн хариуцлагатай дэг журамтай замын хөдөлгөөнд оролцох ёстой. Иймд энэ асуудал дээр нийслэлийн Тээврийн газар холбогдох аж ахуй нэгж байгууллагууд онцгой анхаарах шаардлагатай байгааг Замын цагдаагийн газраас анхааруулж байна.