“Бразил-2015” Дэлхийн ур чадварын тэмцээнд токарь фрезерчний мэргэжлээр Барилгын политехник коллежийн токарийн ангийн сурагч Хадаагийн Лхагва эх орноо төлөөлөн оролцохоор шалгарлаа. Тэрбээр энэ жил 17 нас хүрч буй ч эзэмшсэн мэргэжлээрээ хэнээс ч дутахгүй гэдгээ “Монгол ур чадвар-2015” тэмцээнээр харуулж чадав. Өрсөлдөгчөөсөө гурван оноо илүү авч 35 оноогоор түрүүлсэн Х.Лхагватай уулзлаа.

х

-Баяр хүргье. Дэлхийн тэмцээнд явах эрхтэй боллоо шүү дээ?

-Баярлалаа. Маш их баяртай байна. Бас их хариуцлага ирж байгааг ойлгож жаахан сандарч байна шүү.

р

-Токарьчин мэргэжлийг яагаад сонгов?

-Төмрөөр юм хийдэг гэдгийг л мэдэж байснаас мэргэжлээ сайн судлаагүй л сургуульд орсон. Гэхдээ орсон хойноо, сурах хугацаандаа энэ мэргэжлийнхээ сайхныг мэдэрч дуртай болдог юм билээ. Одоо бол би энэ мэргэжлийг сонгосондоо тун их баяртай байгаа.

р

-Сургуулиа хэзээ төгсөх вэ?

-Ирэх арванхоёрдугаар сард төгсөнө.

р

-Сурах хугацаандаа юу хийж сурав?

-Их юм сурсан. Ажлын зураг нь байвал юуг ч хийж чадна.

р

-Өнөөдрийн тэмцээний даалгавар хэцүү байсан уу?

-Өмнө шатны тэмцээнүүдийг бодвол хамаагүй хүнд байлаа. Нэг детал дээр олон төрлийн ховил энэ тэр гээд үйлдэл ихтэй зураг өгөөд тэр дагууд нь зорж хийх байсан. Зургаа харж байгаад программаа зохиогоод машинаа тохируулж зургийн дагуу хийх ёстой байсан.

р

-Хугацаандаа амжсан уу?

-Амжсан.

р

-Багаж тоног төхөөрөмж нь ажиллахад амархан юм уу?

-Манай сургуулийн токарийн машин, тоног төхөөрөмж сайн шүү дээ. Бид ажиллаад дасчихсан болохоор хэцүү зүйл байгаагүй.

р

-Солонгост дадлага хийхэд оролцсон уу?

-Оролцсон. Тэнд шинэ программ сурч, олон зүйл үзэж мэдэж авсан. Ер нь бол Солонгост бидний түвшин нэлээд ахисан гэж багш нар минь үнэлж байгаа. Ганц өөрийн сургууль гэхгүйгээр бусад газарт миний мэргэжлийнхэн юу хийж чаддаг, тэдний хэрэглэж байгаа багаж тоног төхөөрөмж ямар байгааг харах их туршлага болдог юм билээ.