Өнгөрсөн долоо хоногийн эхээр Кабул хотын оршин суугч 27 настай Фуркунда гэгчийг коран судрыг гутаасан хэргээр 50 гаруй залуус чулуу, тоосгоор цохиж аминд нь хүрсэн билээ. Түүнийг хашааныхаа үүдэнд “Коран судрыг чөтгөр ав” гэж бичсэн хэмээн буруутгаж, амийг нь хөнөөсөн юм. Тэгвэл өнөөдөр эмэгтэйг сүүлчийн замд нь үджээ. Энэ үеэр харгис аллага үйлдсэн этгээдүүдийг хуулийн дагуу шийтгэхийг Засгийн газраасаа шаардаж, 1000 гаруй эмэгтэй жагссан тухай “www.dailymail.co.uk” мэдээллээ.

1

Жагсагчид эмэгтэйчүүдийн эрхийг хамгаалах хууль дутмаг байгааг буруутгаж, “Эмэгтэй хүн хүүхэд гаргаж, гэрээ цэвэрлэх ёсгүй. Бид ч гэсэн боловсрол эзэмшиж, төрийн байгууллагад ажиллахыг хүсч байна. Бидний эрхийг хамгаалахгүй бол тун удахгүй Афганистанд эмэгтэй хүн үлдэхгүй” гэж мэдэгджээ. Тэд Ерөнхийлөгч Ашраф Ганитай уулзах хүсэлт тавьсан ч татгалзсан хариу авчээ. Эмэгтэйн ээж “Харамсалтайгаар амиа алдсан охиныхоо төлөө Ерөнхийлөгчтэй заавал уулзах болно. Охиноос минь Афганы бүх эрчүүд уучлалт гуйх ёстой” гэж хэлжээ. Жагсаалыг тараахын тулд нулимс асгаруулагч хэрэглэж, 100 гаруй хүнийг түр саатуулсан байна.

Өнгөрсөн онд коран судрыг гутаасан гэх үндэслэлээр 11 эмэгтэй чулуу, тоосгоор цохиулж амиа алдсан юм. Ашраф Гани Ерөнхийлөгчөөр сонгогдох үедээ өмнөх зууны үеийн харгис дэглэмийг халахаа мэдэгдэж, түүнийгээ ажил хэрэг болгоно хэмээн амласан билээ.

1

Б.Дэлгэрцэцэг