Нийслэлийн хоёрдугаар төрөх эмнэлгийн мэдээгүйжүүлэлт, сэхээн амьдруулах, эрчимт эмчилгээний эмч О.Энхмаа “Эх үрсээ халуун сэтгэлээр өлгийдөцгөөе" хэмээх хүмүүнлэгийн аяныг санаачлан хэрэгжүүлж эхэлсэн талаараа мэдээлэл хийлээ.

б

Энэхүү аяныг царцаасан барилгуудын нэг болох дөрөвдүгээр төрөх эмнэлгийн барилгыг ашиглалтад оруулахаар зорьж өрнүүлж байгаа аж. Тус барилгын санхүүжилтийн 95 хувийг буюу 19 тэрбум төгрөгийг улсын төсвөөс гүйцэтгэгч компани болох “Нийслэл өргөө"-д олгосон ч барилгын ажлын явц одоогоор 60 хувьтай зогсчихоод байгаа юм.  Тиймээс тус эмнэлэгийг энэ онд ашиглалтад оруулахаар рок попын оддын тоглолтыг зохион байгуулахаар болжээ.

б

“Эх үрсээ халуун сэтгэлээр өлгийдөцгөөе" аяны санаачлагч О.Энхмаа “Зөвхөн нийслэлд сая 300 мянган хүн амьдардаг байтал улсын дөрөвхөн төрөх эмнэлэгтэй. Эмнэлгүүд нь ачааллаа дийлэхгүй байна. Нэг орон дээр хоёроос гурван эх зөрөөд хэвтэнэ. Зарим нь бүр коридорт гудас дэвсээд хэвтэж эсвэл өрөө сулартал тарианы өрөөнд хүлээх жишээтэй. Амаржсан эх эмнэлэгт гурваас тав хонох ёстой байтал ачаалал ихтэй учраас нэгээс хоёр хонуулаад эмнэлгээс гаргадаг. Энэ нь эх нярайн эрүүл мэндэд сөрөг нөлөөтэй. Эмнэлгийн орчинд бус машин дотор төрөх тохиолдол ч байна. Энэ нь  халдвар авах, цус алдах, хүчилтөрөгч дутагдах зэрэг эх, үрийн эрүүл мэнд эрсдэх өндөр магадлалтай. Энэ мэтчилэн хотын төвөөс зайдуу Шувуун фабрик, Өлзийт хорооллоос олон эхчүүд төрөх гэж хот руу орж ирдэг. Би нийслэлийн яаралтай түргэн тусламжийн төвд ажиллаж байхдаа  хоногийн хоол, өмсөх хувцасгүй нэн ядуу айлд хүртэл очиж, эмнэлгийн тусламж үйлчилгээг хүргэж байсан. Өнөөдөр төрөх эхчүүдийн асуудал үнэхээр хүнд байна” гэж ярилаа.

б

Аяны хандивын  тоглолтод МУГЖ, Зууны манлай дуучин Б.Сарантуяа, “Чингис хаан" хамтлагийн ахлагч Д.Жаргалсайхан, дуучин СТА Т.Дэлгэрмөрөн, BX, Бичүү, залуу уран бүтээлч А.Хишигдалай, Улсын филармонийн гоцлол дуучин Л.Насанбуян, Амина, Баярцэнгэл, Отгончимэг нараас гадна “Хар сарнай", “Мотив", “Гурван бүдүүн", “Увертура", “Bit" зэрэг хамтлагийн бүтээлчид оролцох юм байна. Энэ сарын 27-нд болох рок, попын нэгдсэн  тоглолтын дараа зохион байгуулах олон тоглолт, арга хэмжэээд иргэдийг нэгдэхийг уриаллаа.  Тус аяныг дэмжиж, хамтарч ажиллах хүсэлтэй хувь хүн, албан байгууллагууд 99748016, 91360502, 88824051, 99252540 дугаарын утсаар холбоо барьж болох юм байна.

ө

Б.Хүлэг