Хятадын нэрт жүжигчин Жеки Чаны “www.talktalk.co.uk” сайтад өгсөн ярилцлагыг хүргэж байна.

-Сүүлийн үед танай гэр бүлийг хэвлэлийнхэн гол байгаа болгосон. Энэ бүхэн танд дарамт учруулж байна уу?

-Тиймээ. Өнгөрсөн жил бага зэргийн барьц алдсан жил байлаа. Амьдрал өөрөө саад бэрхшээлийг санаатайгаар бий болгодог учир урьдчилан мэдэж, зайлсхийх боломж олдсонгүй. Эр хүн хэдий ч хэсэг хугацаанд нулимстайгаа нөхөрлөж, хорвоод ганцаараа үлдсэн мэт уйтгар гунигийг мэдрэх аймшигтай байлаа.

-Таныг уйлуулсан хүнийг дэлхий нийтээрээ мэдэж буй. Та хүүгээ хар тамхины хэрэгт орооцолдоод цагдаа нарт баригдах үед... Уучлаарай Жеки, энэ асуултыг хэрхэн дуусгахаа мэдэхгүй байна?

-Ойлгомжтой. Таны асуултыг сайн ойлгож байна. Өнгөрсөн оны дундуур Жейси урмыг минь бага зэрэг хугалж, ээжийгээ олон өдөр уйлуулсан. Тиймээ би хүүдээ гомдож, ертөнц мөхөж байгаа мэт болсон.

Жейки Чан гэх хятад эр ганцхан хүүхэдтэй. Ганцхан хүүхэд нь урмыг нь хугалж, болохгүй гэсэн болгоныг сонирхох нь яг л аянгад цохиулахтай адилхан.

Би итгэж байсан. Хүүгээ болохгүй зүйлийг хэрэглэхгүй гэдэгт. Анх цагдаад баригдахад “Хүүдээ итгэж байна” гэх итгэл дүүрэн үгийн тааралдсан хүн бүхэнд хэлж байлаа. Харин үнэн илчлэгдэх үед бусдаас нуугдмаар болсон.

-Жейси зургаан сар хорих ялаар шийтгүүлж, байцаагдаж байсан өдрийг нь тооцож, өнгөрсөн нэгдүгээр сарын эхээр суллагдсан. Олон нийт таныг нэр хүндийнхээ тусламжтайгаар хүүгээ ялаас мулталсан хэмээн буруутгаж байгаа. Энэ асуулт, төөрөгдөлд ямар хариулт өгөх вэ?

-Тиймээ. Би ярилцлага өгөхийг зөвшөөрсөн минь энэ асуудалтай шууд холбоотой. Хойч үе, цаашид амьдрах хүмүүст хандаж хэлэхэд хар тамхи болон согтууруулах ундааг хорвоод байдаггүй хэмээн бодох хэрэгтэй. Би урлагийн сайхнаар тив дамнасан олон сая фэнтэй болсон. Жейсигийн шүүх хурал нээлттэй болж, шүүхийн шийдвэрийг танилцуулахад, намайг хайрлаж хүндэлдэг тэр хүмүүс намайг алдар нэрээ шүүхийн танхимд ашигласан хэмээн буруутгаж, үл итгэх байдлыг харуулсан. Хятадын хуулийг хүссэн хүн нь өөрчилж болдоггүй. Чи хэн ч байсан хариуцлагаас мултарч, шүүхийг хуурч, доромжилж болохгүй. Би үл итгэсэн, хүүгээ өмгөөлсөн мэдэгдэл олон удаа хийсэн минь алдаа болсон.

-Та 20 гаруй жилийн өмнөөс НҮБ-ын элчээр сонгогдож, олон хүүхэд залууст өнөөдрийг хүртэл үлгэр жишээ үзүүлж явна. Гэтэл аав, хүү хоёрын өнгө цагаан, хар болон өөрчлөгджээ?

-Уран бүтээлийн төлөө хэтэрхий их хөөцөлдсөн хүн ар гэрээ мартдаг зовлонтой. Миний хүү намайг дагаж долоон наснаасаа эхлэн зураг авалтын талбай дээр хүүхэд насаа өнгөрүүлсэн. Энэ хугацаанд хүүгээ ямар хүн болж байгааг тоогоогүй нь миний буруу.

-Холливуудын ихэнх од өдөр бүр хар тамхины хэрэгт холбогддог?

-Хятад бол Холливууд биш. Хятад дотоод дүрэмтэй улс.

-Жейси шоронгоос гарсныхаа дараа олон нийтээс уучлалт гуйсан. Тэрбээр аав, ээжийнхээ итгэлийг алдсандаа харамсч буйгаа илэрхийлсэн?

-Бидний итгэлээс илүү олон нийтийн итгэлийг алдана гэдэг үхснээс өөрцгүй.

-Та хүүгээ уучилсан уу?

-Уучлаарай, энэ асуултыг яг одоо хариулмааргүй байна. Бидний харилцаа муудсан. Гэхдээ алдаа гаргасан ч гэсэн Жейси миний хүү. Жейси 32 настай. Тэр том хүн болсон. Орохыг хүсээгүй газраа ороод үзсэн юм чинь одоо алзахгүй байх.

-Үнэн гэж үү. Та үнэхээр хүүгээ уучлаагүй гэж үү?

-Би хүүгээ уучилсан. Алдаа гаргасан үрээ уучилж үзээгүй эцгийг олох бэрх байх.

 Б.Дэлгэрцэцэг