АНУ-ын Хойд Каролина мужийн цагдаагийн ажилтан 33 настай Майкл Слагер үүргээ гүйцэтгэж байхдаа 50 настай Вальтер Скотт гэх эрийг найман удаа буудаж, аминд нь хүрсэн тухай “www.dailymail.co.uk” мэдээллээ. Амиа алдсан залуу хэрэг гарах өдөр хэн нэгнээс зугтааж байгаа мэт хурдтай гүйж байжээ. Түүнийг цагдаагийн ажилтан зогсохыг шаардсан ч, шаардлагыг үл тоон гүйсэн байна.

Цагдаа аргагүйн эрхэнд гал нээсэн гэж мэдүүлгийнхээ үеэр дурьджээ. Гэхдээ тэрбээр сануулга өгөх зорилгоор ганц удаа гал нээхэд хангалттай байхад найман удаа буудсан явдлыг Скоттын гэр бүл буруутгаж “Өнгөт арьст бүхэн хулгайч биш. Бид гүйж, хурдан алхаж ч болохгүй гэж үү” гэж мэдэгджээ.

Цагдаагийн ажилтан гал нээж, залуугийн аминд хүрч буй бичлэг нийтэд хүрсэн бөгөөд бичлэгт Скотт ямар ч буруугүй, зөвхөн гүйж байгаа нь бичигджээ. Түүнийг газар унасны дараа цагдаа Слагер дэргэд нь очоод “Муу новш. Буудуулж байхдаа таарсан амьтан” гэж хэлж буй нь бичигджээ. Скотт цэргийн хүн бөгөөд ахмад цолтой аж.

Сүүлийн үед өнгөт арьстай хүмүүс хохирогч болох нь ихэссэн юм. Фергюсон хотын иргэн Майкл Браун хүүгийн үхлээс болж АНУ-ын 120 хот, мужид жагсаал болж, Ерөнхийлөгчөө өнгөт арьстай иргэдээ хамгаалахыг хүссэн билээ. Энэ он гараад 10 гаруй өнгөт арьст иргэн буудуулж, амиа алджээ. Тэдний ихэнх нь дэлгүүр болон худалдааны төв дээрэмдэж байхдаа амиа алдсан байна.

Б.Дэлгэрцэцэг