Хилийн чанадад амьдарч байсан насанд хүрээгүй 16 хүүхдийг Гадаад хэргийн яамны Консулын газраас эх оронд нь авчирчээ.

Тухайлбал, дөрвөн жилийн өмнө манай улсын иргэн нэгэн эмэгтэй БНХАУ-ын Эрээн хотын хятад айлд хүүхдээ орхиод явчихсан. Өөрөө архины хордлогын улмаас нас барж, хүүхдийг хятад айл өсгөсөн явдал гарчээ. Хүүхэд 6 нас хүрч, сургуульд орох болоход хятад айлын эзэн Эрээн дэх консулын газар ирж мэдэгдсэн байна.

Энэ тухай Консулын газрын захирал Н.Батаа “Хүүг үлдээсэн айл сайн хүмүүс байж, хүүхдийг сургуульд орох болохоор Эрээн дэх консулын газарт ирж хандсан. Монгол иргэншилтэй хүүхдийг тэнд сургуульд авдаггүй болохоор манай төлөөлөгчийн газарт хандсан байгаа юм. Бид эндээс хүүхдийн эмээг хайж олж уулзан, хүүг эх оронд нь авчирсан” гэж ярьсан.

Түүнчлэн манай улсын иргэд гадны оронд ажиллаж амьдрахдаа тухайн улсынхаа хууль дүрэмд захирагдан, анхаарал болгоомжтой байхыг онцгойлон анхааруулж байсан юм.

Б.Хүлэг