УИХ дахь МАН-ын бүлэг өчигдөр хуралдсан. Хуралдаанаар хэлэлцсэн асуудлын талаар тус намын бүлгийн дарга С.Бямбацогт нар  сэтгүүлчдэд мэдээлэл хийлээ. Бүлгийн хуралдаанаар Засгийн газрын 2012-2016 оны үйл ажиллагааны хөтөлбөрийн хэрэгжилтийг эрчимжүүлэх тухай УИХ-ын тогтоолын төслийг хэлэлцээд дэмжих боломжгүй хэмээн үзжээ.

МАН Засгийн газарт хамтрахдаа улсаа бодлоготой хөгжүүлье гэж АН-тай зөвшилцлийн  гэрээ байгуулсан.  УИХ намрын чуулганаараа Эдийн засгийн хүндрэлийг даван туулах хөтөлбөрийг баталсан. “Түүнд хөрөнгө оруулалт татъя,  Оюутолгой, Тавантолгой төслүүдээ урагшлуулъя, ингэхдээ Монгол Улсын язгуур эрх ашигт нийцүүлж, төслөө хөдөлгөе, импортыг орлох бүтээгдэхүүний үйлдвэрлэлийг бий болгоё, зарим импортын бараанд татвар ногдуулъя гэх мэтчлэн эдийн засгийн хүрээнд хэрэгжүүлэх арга хэмжээний хүрээнд олон зүйлийг тусгасан. Гэвч энэ чиглэлийн ажил урагштай биш, нөгөөтэйгүүр, аж ахуйн нэгжүүдийг хяналт шалгалтаар далайлгах замаар дарамт багасахгүй байгаа тул бодлогоо эргэж харах шаардлага байна хэмээн бүлгийн дарга С.Бямбацогт мэдээлэв.

 Сүүлийн хоёр жилд татварын орлого төвлөрүүлэлт 1 их наядаар тасарчээ. Тодруулбал, 2013 онд төсвийн орлого 1.1 их наяд төгрөгөөр, 2014 онд 1.3 их наяд төгрөгөөр тасарсан байна. Улсын хэмжээнд 54 мянган аж ахуйн нэгж бүртгэлтэй байгаагаас 24 мянга нь үйл ажиллагаа эрхэлж, 27 мянга нь хаалгаа барьжээ. Гэтэл чадан ядан үйл ажиллагаа эрхэлж байгаа компаниудаас 11.200 нь татварын давхар хяналт шалгалтад орсон байгаа нь УИХ-аас баталсан Эдийн засгийн хүндрэлийг даван туулах хөтөлбөрт заасан ажлууд ажил хэрэг болохгүй, хоёр намын Засгийн газарт хамтрахдаа байгуулсан гэрээнд заасан заалт хэрэгжиж байна гэж үзэх үндэслэл харагдахгүй байгаа аж. Тиймээс бүлэг энэ чиглэлээр шаардлагаа тавих шийдэлд хүрчээ.

Бүлгийн хуралдаанаар Улсын нэгдсэн төсвийн 2016 оны төсвийн хүрээний мэдэгдэл, 2017-2018 оны төсвийн төсөөллийн тухай хуулийн төслүүдтэй танилцаж, гол үзүүлэлтүүд ямар байгааг хэлэлцжээ.

Энэ хүрээнд төсвийн зарлагыг 116.4 тэрбум төгрөгөөр бууруулахаар оруулж ирсэн нь бодитой хэмээн үзсэн байна. Гэхдээ Төсвийн тухай хуульд өөрчлөлт оруулах хүрээнд ашигт малтмалын нөөц ашигласны төлбөрийн 30 хүртэл хувийг орон нутагт үлдээх заалт оруулж ирсэн нь оновчгүй гэжээ. Уг хууль батлагдсан нөхцөлд хөрөнгө гарын салаагаар урсах замыг нээж өгнө. Нөгөө талдаа Засгийн газар эдийн засгийн хямралыг даван туулах зөв гарцыг одоо хэр нь олоогүй байна. Тиймээс гадаад, дотоодын эдийн засагчид, олон улсын байгууллагаас өгч байгаа зөвлөмжүүдийг хэрэгжүүлэх чиглэлд анхаарах. Алдааг засч, залруулахад хамтраад ажиллах гарц хайх ёстой хэмээн үзсэн талаар УИХ-ын гишүүн Д.Хаянхярваа мэдээлэв.  

Ингэхдээ Төсвийн тухай хуульд өөрчлөлт оруулах хуулийн төслийг Засгийн газар татаж аваач ээ гэх хүсэлтийг Сангийн сайдад тавьсан байна.

МАН-ын бүлгийн дарга С.Бямбацогт мэдээлэл хийснийхээ дараа сэтгүүлчдийн сонирхсон асуултад хариулав.

-Тавантолгойн гэрээнд санал дүгнэлт өгөх ажлын хэсэгт танай намын бүлгээс гурван гишүүн орсон.  Ажлын хэсгийнхнээс мэдээлэл сонссон уу?

-Манай бүлэг ажлын хэсгээ өнгөрсөн хоёрдугаар сард байгуулсан. Я.Содбаатар гишүүн ахалж, Су.Батболд Д.Хаяанхярваа, Б.Чойжилсүрэн, Д.Сумъябазар гишүүн ажлын хэсэгт багтсан. УИХ-ын даргын байгуулсан ажлын хэсэгт гурван гишүүн орсон. Эдгээр гишүүд бүлэг дээр мэдээлэл хийсний дараа бүлэг шийдвэрээ гаргана. Ер нь МАН-ын бүлэг Тавантолгойн гэрээний төслийн хэлэлцэх эсэхийг шууд дэмжээд, дараа засч, залруулах зүйл байвал ажиллаад явах ёстой гэсэн байр суурь барьж байгаа.

-Тусгаар тогтнолын ордонд болсон бүлгийн хуралдаанаар МАН Засгаас гарах тухай асуудлыг ярьсан гэсэн мэдээлэл байна. Засгийн газарт ажилласан үр дүнгээ хэрхэн дүгнэж байгаа вэ?

-АН-тай засагт хамтрахдаа олон асуудал дээр гэрээ байгуулж, тохиролцсон. Гэтэл АН гэрээнд тусгагдсан зүйлүүдээ хэрэгжүүлэхгүй байх байдал гарч болзошгүй юм байна. Цаашдаа ийм байдалтай байвал эдийн засгийн хямралаас гарах төлөвлөгөө юу болох вэ гэдэг асуудал бүлэг дээр яригдсан. Үнэхээр түншлээд явах түнш мөн үү биш үү, дээгүүрээ тэврэлдээд доогуураа өшиглөдөг байхвий гэсэн зүйл яригдсан. Гэхдээ энэ асуудлаар албан ёсоор шийдвэр гаргаагүй. Зарим гишүүдээс ийм санал гарч байсан.