ХХАА-н дэд сайд Б.Батзориг болон МХЕГ-ын дарга Ш.Раднаасэд нар ӨМӨЗО-ны Хяналт шалгалт, хорио цээрийн газрын дарга Жан Шао Тонгтой уулзаж ярилцжээ. Дэд сайд Б.Батзориг Монголоос хөдөө аж ахуйн гаралтай бүтээгдэхүүн экспортлоход хяналт шалгалт, хорио цээрийн тал дээр нээлттэй хамтарч ажиллана гэдэгт итгэлтэй байгаагаа илэрхийлсэн байна.

Түүнчлэн хоёр орны гадаад худалдааг хөнгөвчлөх үүднээс хилийн боомтуудын дэд бүтцийг сайжруулах, хорио цээрийн бичиг баримтын нөхцлийг ижилсүүлэх, бүтээгдэхүүний тухай нэгдсэн цахим сантай байх мөн боомт дээр тээврийн хэрэгсэлд халдваргүйжүүлэлт хийх тоног төхөөрөмж суурилуулахад хөрөнгө оруулж хамтран ажиллах саналыг тавилаа.

Хяналт шалгалт, хорио цээрийн газрын дарга Жан Шао Тонг болон албаны хүмүүс бүх талаар дэмжиж хамтран ажиллана гэдгээ илэрхийлэв.

Ирэх долоодугаар сард Бүх Хятадын Хяналт шалгалт, Хорио цээрийн газрын дэд дарга Ү Жин Хай Монголд ирэх аж. Энэ үеэр хорио цээрийн асуудлыг нарийвчлан тохирч чадвал энэ намраас ХАА-н гаралтай бүтээгдэхүүнээ урд хөрш рүү экспортлох боломж нээгдэнэ.