УИХ-аас Цагаан суваргын ордод төр хувь эзэмших шаардлагагүй гэсэн шийдвэрийг гаргасан. Харин УИХ-ын гишүүн Д.Цог төр хувь эзэмших ёстой хэмээн үзэж, энэ асуудлаар Үндсэн хуулийн цэцэд хандсан. Үндсэн хуулийн цэц УИХ-ыг хууль зөрчөөгүй хэмээн үзсэн билээ. Тэгвэл энэ дүгнэлтийг өчигдрийн УИХ-ын чуулганы нэгдсэн хуралдаанаар хэлэлцсэн. Энэ үеэр УИХ-ын гишүүн Ж.Батзандан багагүй "агсамнаж", ард түмний өмчийг хувийнханд өгөхгүй хэмээн хармын зан гаргасан. Тэрбээр  "УИХ ард түмний өмчийг Нямтайшир, Н.Номтойбаяр хоёрт өгөх шийдвэрийг гаргасан. Та хоёрт аз, жаргал хүсье. Идээд цадаарай. Монголын баялагаар бага тоглоорой гэж хэлье. Нямтайшир сайн хүн байж болно. Гэхдээ нэг хүн, нэг компанид төрийн ордыг өгдөггүй юм. Газрын доод баялаг ард түмний өмч. Ард түмний өмчийг ингэж хувийн компанид өгч болохгүй" хэмээн хэлсэн юм.

Тэгвэл Ерөнхийлөгч Ц.Элбэгдорж энэ талаар өөрийн байр сууриа твиттер хуудсаараа дамжуулан илэрхийлжээ. Ерөнхийлөгч "Монгол Улсад бүтээгдэж баялгийн 80 хувийг бүтээж байгаа хувийнхан ч ард түмэн" хэмээн жиргэсэн байна.