МАХН-ын дэд дарга, УИХ-ын гишүүн Д.Тэрбишдагва Хүүхдийн баярыг Сөүлд тэмдэглэхээр болжээ. МАХН-ын дарга Н.Энхбаярын төрсөн өдөр зургаадугаар сарын 1 буюу Олон улсын хүүхдийн эрхийг хамгаалах өдөр тохиодог. Тиймээс ч тус намын дэд дарга Д.Тэрбишдагва энэ амралтын өдрүүдэд Сөүлийг зорьж, намын даргатайгаа уулзан төрсөн өдрийн баярт нь оролцох юм байна. 

Д.Тэрбишдагва гишүүн сүүлийн үед намын даргатайгаа түнжин хагарч, тойруухан явсан. Үүнийг Н.Энхбаярын эх орондоо ирж Цагаан сар тэмдэгдлэн, намынхантайгаа хийсэн золголт, үдэж мордуулсан хэсэг хүмүүсийн дотор Д.Тэрбишдагва гишүүн байгаагүй зэрэг үйл явдал гэрчилнэ. Эр улс, тэр дундаа улс төрд зүтгэж яваа журмын нөхөр байтугай сайн андууд ч салам маргалдаж, нударга зөрүүлэх тохиолдолд гардаг хойно, энэ нь сүйдтэй зүйл биш гэж зарим нь ярьж байгаа бол “үхсэн буурын толгойноос амьд ат айна” гэгчээр Н.Энхбаяр төрийн эрх мэдлээс буусан ч зуумтгай зангаа тавиагүй хэмээн хаширлах нэгэн ч байна лээ. Тиймээс ч Д.Тэрбишдагвын энэ “эргэлт” хувь улстөрчийн хувиар ч намын даргатайгаа ойлголцолд хүрэх, итгэлцлээ бэхжүүлэх давхар санаа агуулж байгаа биз.

Харин улс төрийн ажиглагчдад Д.Тэрбишдагва МАХН-ын даргадаа төрсөн өдрийн ямар бэлэг өгөх нь чухал бус. МАХН-ын дарга Н.Энхбаяр л эрхэм гишүүнийг ямар бялуугаар дайлах нь илүүтэй сонирхол татаж байна. Гэхдээ Д.Тэрбишдагва гишүүн намын даргадаа гар, ганзага хоосонгүй очсон. Учир нь тэрбээр Сөүлд очихоосоо өмнө Токиод бууж, журмын нөхөр, Ерөнхий сайдын Эдийн засгийн бодлогын зөвлөх О.Чулуунбатыг “эргэсэн”.  Ерөнхий сайдын эдийн засгийн бодлогын зөвлөх О.Чулуунбат хүнд өвчин тусч, Токиод эмчлүүлж байгаа юм. Ямартай ч түүнийг эдгэнэ гэж япон эмч нар хэлсэн гэсэн сайхан мэдээ байна.

Хэдийгээр бие нь чилээрхүү байгаа ч Монголын толгой эдийн засагч, банкир О.Чулуунбат “Тавантолгой”-н болон “Оюутолгой”-н далд уурхайн гэрээний төслийн талаар өөрийн байр суурь болон намын бодлогод нийцэх зөвлөгөөг МАХН-ын дарга Н.Энхбаярт Д.Тэрбишдагваар дайлгасан байх. Тиймээс ч төрсөн өдрийн баярын оргилуун дарсыг буудуулан тулгахдаа “Оюутолгой”-гаар хачирлах нь дамжиггүй.

"Дубай”-н гэрээ төдийгүй “Тавантолгой”-н асуудлаар УИХ дахь “Шударга ёс” эвслийн бүлгийнхэн МАХН, МҮАН-аараа талцан, байр суурь нь хагаралдсан. УИХ дахь МАХН-ын гишүүд ирэх өдрүүдэд “Тавантолгой”, “Оюутолгой”-н асуудалд намын байр суурь ямар байх, УИХ дахь “Шударга  ёс” эвсэл орших уу, эс орших уу гэх шийдвэрийг Сөүлээс хүлээж байгаа.

Шийдлийн Засгийн газарт ЭМС-ын, БХ-ын сайдыг МАХН-аас томилсон. МАХН-ын дарга Н.Энхбаяр “Оюутолгой”-н асуудал ямар шийдэлд хүрэхээс Шийдлийн Засгийн газарт байх эсэхээ шийднэ. Хэдийгээр гишүүд нь сайдаасаа огцрох хүсэлгүй ч намын дарга тушаасан л бол суудлаасаа бууна. Гэхдээ МАХН-ынхан засгаас гарснаар шийдлийн Засгийн газрын суудал ганхахгүй. Учир нь эрх баригч АН-ынхан Засгийн газрынхаа эсрэг кноп дарвал ирээдүйд тэднийг ямар хувь заяа хүлээж байгааг эрхбиш гадарлана. Цаашлаад МАХН хийгээд хувь гишүүдийн өргөн барьсан асуудал УИХ дахь МАН-ын бүлгийнх биш. МАН өрөөлийнхийг бус өөрийнхөө байр суурийг л дэмждэг.

Харин Сөүлээс илгээх төрсөн өдрийн бялуу хэнийг онилох, хэнд чиглэх, ямар шинэ хувилбартай байх зэрэг ээлжит популизм л зуны халуун өдрүүдэд олны сонирхол татан үргэлжлэх болов уу.

Н.Энх