Тавантолгойн хөрөнгө оруулалтын гэрээний төслийг даваа гаригаас хэлэлцэж эхэлсэн. Өчигдөр хуралдсан Эдийн засгийн байнгын хорооны ажлын хэсгийн хуралдаанаар энэ асуудлыг хэлэлцсэн. Гэвч хуралдаан хаалттай болсон учраас асуудлыг хэрхэн хэлэлцсэн мэдээлэл тодорхойгүй байна.

Өнөөдөр хуралдах Эдийн засгийн байнгын хорооны хуралдаанаар энэ асуудлыг хэлэлцэж, УИХ-ын нэгдсэн чуулганд оруулах эсэхийг шийдвэрлэнэ. Мөн гишүүн Л.Эрдэнэчимэг ахлагчтай УИХ-аас томилогдсон ажлын хэсэг Тавантолгойн асуудлаар 11.00 цагт Төрийн ордонд мэдээлэл хийхээр тов зарлаад буй.

Оюутолгойн далд уурхайн асуудал шийдэгдэж, хөрөнгө оруулагчид санхүүжилт босгох ажилдаа шуудраад буй. Харин хоёр дахь том төсөл болох Тавантолгой урагшлах эсэх нь энэ долоо хоногт тодорхой болно. Хөрөнгө оруулагчид нь аль хэдийнэ тодорхой болсон энэ төсөл төрийн шийдвэр гаргагчдын түвшинд гацаад багагүй хугацааг өнгөрөөж байна.