Өнөөдөр нар буцна. Нараа буцаж байгааг мэдрүүлэх гэсэн мэт хурмаст тэнгэр хураа харамгүй хайрлах нь.

Ойрын хэдэн өдөртөө л усан бороо уйлагнана хэмээн цаг уурчид анхааруулж байна. 

Ямартай ч энэ сарын 26-ныг хүртэлх цаг агаарын мэдээгээр ихэнх нутгаар түр зуурын бороо орох гэнэ. 

 Ийнхүү байгаль дэлхий, гариг эрхэс, он цаг тооллын бас нэгэн солбицлыг хүн төрөлхтөнд харуулдаг дэлхийн хамгийн урт өдөр, хамгийн богино шөнө өнөөдөр тохиож байна. 

Зурхайч Л.Тэрбишийн хуанлид тэмдэглэснээр бол өнөөдөр наран 05:03 цагт мандсан бөгөөд үдэш 20 цаг 57 минутад жаргах ажээ. Энэ нь жилийн 365 хоногийн эргэлт дэх хамгийн урт өдөр бөгөөд нар бүтэн 15 цаг 54 минутын турш нар биднийг ивээнэ гэсэн үг. Энэ өдөр юмны сүүдэр хамгийн богино болдог гэж нүүдэлчин монголчууд маань ярьдаг.

Учир нь, энэ өдөр нар хамгийн өндөрт мандаж, маргаашнаас нь эхлээд хөөрөх цэг нь доошилдог.  Тийм ч учраас нар буцна гэж бид ярьдаг. 

Харин шинжлэх ухааны ойлголтоор бол зургадугаар сарын 22 буюу энэ өдөр дэлхий нарнаас хамгийн хол, 152 сая км зайд хүрдэг бөгөөд дэлхийн тэнхлэгийн хойд үзүүр нар руу хазайж, үд дундын нар Мэлхийн зам дээр эгц тусдаг байна.

Тиймээс дэлхийн бөмбөрцгийн хойд хагасын бүх өргөрөгт нар хамгийн өндөрт мандаж, хамгийн урт өдөр, хамгийн богино шөнө болдог. Энэ өдөр хойд туйлын цагираг дээр нар жаргахгүй, бүтэн хоногийн туршид мандана. Иймд 6 сарын 22-ны өдрийг зуны туйлын өдөр гэж нэрлэдэг аж.

Тэгвэл энэ өдөр дэлхийн бөмбөрцгийн өмнөд хагаст эсрэгээр нар хамгийн доор мандаж, Экватороос өмнөд туйлын цагираг хүртэл бүх өргөрөгт шөнө нь өдрөөсөө урт болдог байна. 

Б.Дэжид