МАН-ын босго ардын хүүхдүүдэд хатуу басхүү өндөр гэдгийг өнгөрсөн амралтын өдрүүдэд болсон НАМЗХ-ны V чуулган харууллаа. Ер нь “Ардын хүүхэд яагаад ялж болдоггүй наадам бэ” гэдэгтэй агаар нэгэн үйл явц өнгөрсөн амралтын өдрүүдэд МАН-д болж өнгөрөв. Өнгөрсөн бямба гаригт МАН-ын дэргэдэх Нийгмийн ардчилал Монголын залуучуудын холбооны V чуулган болсон. Энэ чуулганы өмнөхөн бага газрын төлөөх их тулаан явагдсан. НАМЗХ-ны Ерөнхийлөгчөөр хэн сонгогдох вэ гэдэг тэнд зүтгэж ирсэн залуучуудын хооронд ширүүн дажин дэгдсэн.

Нэг талд оюутан цагаасаа МАН-ын байрны босгыг элэгдтэл гүйж, халуун нар, ширүүн салхийг үл ажран аливаа арга хэмжээнд нь оролцож гар бие зүтгэж ирсэн залуус, нөгөө талд өнөөгийн улс төрийн хэллэгээр шууд  цонхоор орж ирсэн шинэ цагийн баячуудын хунтайж нарын хооронд тулаан өрнөлөө. Мэдээж энэ хүч тэнцвэргүй тулаанд бэлтэй айлын хүүхэд ялдаг бичигдээгүй дүрэмтэй. Их тулааны өмнөх нам гүм гэдэг шиг НАМЗХ-ны V чуулганы өмнө намын Удирдах зөвлөл хуралдаж, тэдэнд үүрэг чиглэл өгсөн. “Дээрээс өгсөн үүрэг”-ийн дагуу НАМЗХ-ны V чуулган явагдаж, Ерөнхийлөгчөөр Уул уурхайн дэд сайд Г.Тэмүүлэнг сонгов. Өрсөлдөгч нар нь ч амаа үдүүлсэн дэг.

Улс төрийн хүчнүүд дэргэдээ залгамж халаагаа бэлтгэх залуучуудын байгууллагатай байдаг. Энэ холбоо тухайн намын ирээдүй, өнгийг тодорхойлдгоороо жин дарна. Ирэх жилүүдэд тухайн намын нийгэмд хэр нөлөөтэй, хүчтэй байх нь залуу гишүүдээ хэрхэн бүрдүүлж, бэлтгүүлэхээс хамаардаг.

Намын дэргэхэд залуучуудын байгууллага байнгын бэлтгэлтэй байхаас гадна сонгуулийн жилд тэд фронтын халуун цэгт ажиллах гол хүч юм. Мэдээж залуу хүмүүс эрчтэй, хүчтэй, цог золбоотой, хаана ч очсон олон нийтийг хөгжөөж, нэр дэвшигчийг түмэнд эергээр таниулах үүргээ ухамсарласан байдаг. Энэ бүхэнд гүйж харайж, нүүр царай болох мэдлэг, боловсролтой залуу гишүүд НАМЗХ-д олон бий. Гэхдээ НАМЗХ-ны тэргүүнийг сонгох  МАН-ын Удирдах зөвлөлийн шалгуурт бэл, хөрөнгө харгалзсан нь илэрхий. Хоосон хүнээс хоёр чихийг нь авалтай биш гэгчээр залуус албан тушаалд дэвшиж, карьераа өсгөхөд ч мөнгө хүчтэй гэдгийг харуулж байна.  Цаашдаа ч шинэ цагийн баячуудын өв залгамжлагч  хунтайж нарын улс төрийн карьер хөөх  анхны  шат, дамжлага нь НАМЗХ болсоор байх нь. Тэднийг улс төрийн шатаар цааш дэвшихэд НАМЗХ гишгүүр, ивээс болж аж.

Сонгуулийн жил өмнөх Г.Тэмүүлэн намынхаа залуучуудын байгууллагыг тэргүүнээр сонгогдоод зогсохгүй ирэх онд нэр дэвших эрх нь нээгдэж, улс төрийн замналд нь ногоон гэрэл аслаа. Нөгөөтэйгүүр МАН-д ирээдүйн залгамж  халаа үе дамжин бэлтгэгдэж байна. Тэр дундаа  НАМЗХ-ны шинэ Ерөнхийлөгч Г.Тэмүүлэнгийн гэр бүл МАН-д үе дамжин үнэнчээр зүтгэж, МАН ч зүтгэлийг нь үнэлж байх шиг байна. НАМЗХ-ны Ерөнхийлөгч, Уул уурхайн дэд сайд Г.Тэмүүлэнгийн аав Ч.Ганзоригийг Үйлдвэр, худалдааны сайд,  “Эрдэнэт” үйлдвэрийн ерөнхий захирлын албыг хашиж байсан. Өнөөдөр хүү нь Уул уурхайн дэд сайдаар ажиллаж, ааваасаа ч дутахгүй албан тушаал хашиж байна.

Ардын хүүхэд армийн жагсаалд зогсож, хөрөнгөтэй айлын хүүхэд албан тушаалд томилогдож байгаа нь нууц биш. Ер нь төрийн дээд одон медалиар хэн нэгийг шагнахдаа хийсэн бүтээснээс нь гадна цаашид хийж бүтээж чадна гэж олгодог. Тиймээс ч Г.Тэмүүлэнг ирээдүйд, тэр дундаа ирэх сонгуульд хүчээ дайчилж, бэлтэй загнаж, итгэл сэтгэлээ намдаа зориулж чадна гэж улс төрийн энэ карьерт дэвшүүлээ биз ээ. Харин хэтэвч нимгэн ардын хүүхдүүд МАН-д зүтгэх сэтгэл байвал дарцаг бариад жагсаж явахаас бус дарга болно гэж мөрөөдөх нь горьдсоны гарз бололтой.  

Э.Сонор