Оросын программ зохиогч 30 настай Валерий Спиридонов сүүлийн 10 жил нуруу, нугасны өвчнөөр шаналж байгаа юм. Залуугийн биеийн байдал 2010 оны эхээр эрс мууджээ. Түүний тархи хэвийн ажиллаж байгаа ч бие нь ямар ч ажиллагаагүй болсон юм. Өнгөрөгч дөрөвдүгээр сард Италийн эмч Сержио Канавера түүхэндээ анх удаагаа толгой шилжүүлэх мэс засал хийхээр болсноо мэдэгдэж, Валерий Спиридоновыг хагалгаанд орохоор зөвшөөрснийг хэлсэн юм. Мэс засал 2017 оны гуравдугаар сард Италийн Гэгээн Мария эмнэлэгт болох бөгөөд мэс заслыг шууд дамжуулах билээ. Залуугийн өвчний түүхийг 2008 оноос эхлэн судалсан эмч мэс засал амжилттай болно гэдэгт итгэлтэй байгаагаа мэдэгдээд байгаа. Харин энэхүү мэс засалд Оросын эмч, эрдэмтэд оролцохоор болсон тухай “TASS” агентлаг мэдээллээ.

Валерий өчигдөр фэйсбүүк хуудастаа “Би маш их баяртай байна. Дэндүү эрсдэлтэй толгой шилжүүлэн суулгах мэс засалд Оросын эмч, эрдэмтэд оролцохоор болсон. Мэс засал амжилттай болно гэдэгт итгэлтэй байна” гэж бичжээ. Тэрбээр мөн нуруу, нугасаар мэргэшсэн дэлхийн 20 гаруй орны 150 эмчид хагалгаанд оролцож, зөвлөгөө өгөхийг хүссэн захиагаа илгээсэн гэдгээ мэдэгджээ.

Толгой шилжүүлэн суулгах мэс заслын төлбөр 10 сая ам.доллар юм байна.

Б.Дэлгэрцэцэг