Баасан гаригийн УИХ-ын чуулганы нэгдсэн хуралдаанаар гаалийн болон НӨАТ-аас чөлөөлөх хуулийн төслүүдийг хэлэлцсэн билээ. Энэ дунд олны анхаарлыг татсан нэг асуудал байсан нь Лондонгоос авчрах Чингис хааны хөшөө.

Нийт гурван сая еврогийн өртөгтэй энэ хөшөөг УИХ-ын гишүүн Д.Бат-Эрдэнэ өөрийн хөрөнгөөр авчирч буй. 2012 оны зуны олимпийн наадмаар Лондонд байршуулсан хөшөөг ОХУ-ын уран барималч Даш Намдаков бүтээсэн. Дэлхийд хосгүйд тооцогдож буй Чингисийн хөшөөг  БНХАУ, ОХУ, АНУ зэрэг улс орон худалдан авах саналаа илэрхийлж байсан гэнэ.

Чингисийн үр удам эсвэл өндөр үнэ хэлснээрээ ч юм уу, ямартай ч хөшөөг манайх авах нь нэгэнт тодорхой болсон. Харин хаана байрлуулах вэ гэдэг асуулт олны анхаарлыг татаж буй. Тэгвэл энэ асуултад Засгийн газрын хэрэг эрхлэх газрын дарга С.Баярцогт “гадаад дотоодын олон хүн үзэж сонирхох, хотын өнгө жавхааг тодотгоход ач холбогдолтой гэдэг үүднээс Эзэн Чингис хааны талбайд байрлуулахаар төлөвлөж байгаа” хэмээн хариулжээ. Тэгэхээр нэг талбайд гурван хөшөө байрлуулах уу эсвэл Сүхбаатарыг буулгаж, Чингисийг залах уу?

Улаанбаатар хотын төв талбай 240 метр квадрат хэмжээтэй. Энэ үзүүлэлтээрээ дэлхийн томд ордог талбай. Дээр нь тэг дөрвөлжин гэдгээрээ дэлхийд ганцад тооцогддог талбай хэмээн хаа нэгтэйгээс уншиж байсан санагдана. Энэ үүднээс дахиад нэг хөшөө байрлуулахад багтаж, шингэхгүй гэх зовлонгүй. Гэхдээ урлагийн бүтээлтэй зохимж, зохицол гэх үгс дагаж явдаг.

Нэгэнт хөрөнгө мөнгө зарлагадаж, татвараас чөлөөлөхөөр парламент дээрээ хүртэл ярьж, ач холбогдол өгсөн хөшөөг хаа нэгтэй зүгээр "хаяж" болохгүй. Харин ирээдүйд илүү үнэ цэнэтэй болж, олныг татах байршлыг сонговол зүгээр санагдана. Магадгүй Үндэсний цэцэрлэгт хүрээлэнд ч юм уу. Яагаад Үндэсний цэцэрлэгт хүрээлэнд хөшөөт цогцолбор байж болохгүй гэж.

В.Хэрлэн