УИХ-ын чуулганы нэгдсэн хуралдаан завсарлалаа. Үдээс өмнөх хуралдаанаар 2014 оны улсын төсвийн гүйцэтгэлийг хэлэлцэж, байнгын хороодод шилжүүллээ.

Хуралдааны үеэр гишүүд асуулт асууж, санал хэлэв. Энэ үеэр УИХ-ын гишүүн Д.Батцогт МАН-ынханд "агсам тавив". Тэрбээр "Ардын намын гишүүдийн хэлж байгаа үгэнд ганц хоёр үг хэлмээр байна. Номтойбаяр гишүүн, ардын намын бүлгийн дэд дарга хүн. Би ардын намын бодлого гэж үзэж байна. Өчигдөр бүлгийнхээ мэдээллийг хийхдээ Бид засагт ороод ганцхан ажил хийсэн. АН-ын алдаа, но-г олж авлаа гэдэг үг хэлсэн.

Би буруу дуулаагүй бол АН-ыг сонгож болохгүй гэдгийг ухаарлаа гэж хэлсэн. Ажил хариуцсан хүмүүст нь алдаа оноо гэж байдаг бол тэр улсуудад нь хариуцлага тооцохоос АН-ын шударга мөрөөрөө ажлаа хийж байгаа мянга мянган гишүүнийг хавтгайруулж ярих нь буруу. Номтойбаяр шиг гишүүн олон болоод Монголын төр сайхан болчих юм байна л даа. Би тэгж бодохгүй байна. Одоо больё, өөх ч биш, булчирхай ч биш. Би ардын нам засагт орж ирээд сайн зүйл авчирсан гэж бодохгүй байна. Сахил хүртсэн биш шал дордов гэгчийн үлгэр боллоо.

Бүлгийн дэд дарга нь ингэж мэдэгдэж байгаа юм бол зургаан сайдаа тат л даа. Бид дэмжээд өгье. Та нар минь бүтэн нэр, бүлээн зүстэйгээ сонгуульдаа ор. Муу нэртэй, муухай царайтайгаараа бид ялаа үүрээд орьё" хэмээн чамгүй бухимдав.