Хойд Солонгос улсыг үндэслэн байгуулагч, удирдагч Ким Ир Сен 1994 оны долоодугаар сарын 8-нд 82 насандаа таалал төгссөн билээ. Ким Ир Сений том хүү Ким Чен Ир аавынхаа таалал төгссөн өдрийг бүх нийтийн амралтын өдөр болгон зарласан юм. Солонгосчууд нийслэл Пхеньян хотноо байрлах Ким Ир Сений дурсгалын хөшөөнд энэ өдөр хүндэтгэл үзүүлдэг уламжлалтай. Энэхүү өдрийг тохиолдуулан удирдагч Ким Чен Ун, Батлан хамгаалах яамны удирдлагуудын хамтаар өвөг эцэгтээ хүндэтгэл үзүүлсэн тухай “www.dailymail.co.uk” мэдээллээ. Тэрбээр өвөөгийнхөө хөшөөнд хүндэтгэл үзүүлэхээс гадна Пхеньянд хур бороо оруулахыг гуйсан байна.

Сүүлийн хэдэн сар Хойд Солонгост бороо бага орж, ихэнх бүс нутагт ган гачиг нүүрлэж, олон тариаланчид хүнд байдалд ороод байгаа юм. 32 настай удирдагч “Өвөө минь ард түмэндээ туслаач. Агуу удирдагч, ард түмний баатар минь” гэж  хэлжээ.

“Хойд Солонгосын төрийн мэдлийн “KCNA” агентлагт нийтлэгдсэн энэ удаагийн Ким Чен Уны зураг бусад зургаа бодвол илүү үнэмшилтэй, ард түмнээ хайрлаж буй өнгө аястай харагдаж байна” хэмээн “AFP” агентлаг мэдээлжээ.

Б.Дэлгэрцэцэг