Монгол Улсын Ерөнхийлөгч Ц.Элбэгдорж Монгол наадам, дэлхийн наадам болжээ хэмээн хэлсэн. Түүний үгийг батлах мэт дэлхийн өнцөг булан бүрээс жуулчид ирж, монгол наадмыг үзэж сонирхож байна. Тэдний наадмын талаарх сэтгэгдлийг хуваалцлаа. 

Швейцарь улсын иргэн Марк: Хуримынхаа дээлээр гангарлаа

Миний эхнэр Монгол. Сүүлийн гурван жил наадмын нээлтийг үзлээ. Наадмын нээлт үнэхээр их таалагдлаа. Бид хоёр гэрлээд найман жил болж байна. Энэ жилийн наадамд зориулж хуримандаа өмссөн монгол үндэсний дээлээр гангарлаа. Сайхан харагдаж байгаа биз.

АНУ-ын иргэн Эдвард: Нээлтийн билетээ алдчихсан

Би их холоос Монгол наадмыг үзэхээр ирсэн. Их үнэтэй билет худалдан авсан ч нээлтээ үзэж чадалгүйгээр билетээ алдчихлаа. Үнэхээр харамсалтай байна.

Гэхдээ сэтгэлээ сэргээж хэдэн хуушуур идлээ. Таалагдлаа.

Их Британи улсын иргэн Суэл: Би Ерөнхийлөгчийг маш ойроос харсан

Их баяртай байна. Би нээлтийн ажиллагааны үеэр Монгол Улсын Ерөнхийлөгч Цахиагийн Элбэгдоржийг харсан. Гайхалтай. Ер нь ийм ойроос улс төрийн зүтгэлтнүүдийг харж байгаагүй. Дурсамжтай бас хөгжилтэй наадам болж байна. Нааадамд зориулж, дээлээр гангарлаа. Их сэрүүхэн, тухтай байна.

АНУ-ын иргэн Женни: Монгол бөхчүүд их таалагдсан

Би Монголд анх удаагаа ирж байна. Нээлт үзсэн. Надад бөхчүүд их таалагдсан. Их сүрлэг,  эрчүүд байна лээ. 

Одоо сурын харвааны зургийг авах гээд зогсч байна. Монголын түүх, соёл таалагдаж байна.

Испани улсын иргэн Кайлен Жиар: Монголчууд далбаагаа их шүтдэг бололтой

Монголд амьдраад хоёр жил болж байна.  Анх удаагаа наадмын нээлтийг үзлээ. Таалагдлаа.

Монголчууд далбаагаа их шүтдэг гэдгийг наадмын нээлтийн үеэр ойлголоо. Бүх үзүүлбэр сонирхолтой, давтагдашгүй байлаа.

Б.Дэлгэрцэцэг