Монголд юу байна? Тариалалт хийх газар элбэг бий. Муулаад идэх мал хангалттай байна. Гэвч хангалттай байгаа бүхний өртөг хязгаарлагдмал мэт өндөр. Гурил, махны үнэ өснө үү л гэхээс буурч байгаагүй зах зээлийн жамтай. Өдгөө ч гурилын үнэ өсч, цаашид хэрхэн үргэлжлэх нь тодорхойгүй байна.

Монголын үр тариа эрхлэгчдийн “Газар тариалан” холбооны удирдах зөвлөлийн гишүүн, “Молор эрдэнэ орших” компанийн захирал Б.Эрдэнэбат энэ жил ургацын 80 хувийг алдана гэсэн ярилцлага өгч, гал дээр тос нэмж орхив. Түүний ингэж хэлж, шүлс нь хатаж амжаагүй байхад гурилын үйлдвэрүүд үнээ нэмчихлээ. Үнэ нэмэгдэхэд ургацын байдал, тариаланчдын үг нөлөөлсөн гэдгийг нуусангүй.

“Алтантариа” ХХК-ийн Бизнес хөгжлийн хэлтсийн дарга Ч.Аюушжав: Манай компани долоодугаар сарын 25-нд гурилын үнээ 80-100 төгрөгөөр нэмсэн. Иргэдийн худалдан авалт эрс нэмэгдсэн. Ургац алдана гэсэн мэдээллээс болсон байх. Ингэж борлуулалт нэмэгдсэн учраас үлдэгдэл  гурилаа хүмүүст хүргэхийн тулд үнээ бага зэрэг нэмсэн. Цаашид үнэ нэмэх асуудал одоогоор яригдаагүй.

“Милл хаус” ХХК-ийн борлуулалтын алба: Гурилын үнэ кг тутамдаа 50 төгрөгөөр нэмэгдсэн. Гурилын нөөц бага байгаа учраас үнээ нэмсэн. Цаашид нэмэгдэх эсэх нь тодорхойгүй байна.

Харин “Улаанбаатар гурил” ХХК гурилын үнээ нэмээгүй байна. “Улаанбаатар гурил” ХХК-ийн Борлуулалтын албаны дарга Бямбаа: Манай гурилын үнэ одоогоор нэмэгдээгүй. Нэг кг гурил 840 төгрөгийн үнэтэй байна. Ойрын хугацаанд гурилын үнэ нэмэх асуудал яригдахгүй байх. Гурилын нөөц маш бага бий. Шинэ ургацыг хүлээж байна. Буудайны үнэ нэмэгдэхгүй бол гурилын үнээ нэмэхгүй.

Гурилын томоохон үйлдвэрүүд ийм мэдээлэл өгч байна. Ургац алдана гэсэн яриагаар иргэдийн худалдан авалт ч нэмэгдэж. Үүнийг дагаад үйлдвэрүүд үнээ нэмжээ. Дээр нь үйлдвэрүүдэд гурил, буудайн нөөц маш бага байгаа гэнэ. Байгаа жаахан гурилынхаа үнийг “хаданд гаргаж”, хэрэглэгчид ч кг тутамдаа 50-100 төгрөгөөр нэмэгдсэн гурил идэж байна. Чоно бороог далимдуулсан нь энэ.

Гурилын үйлдвэрүүдийн үнийг өсөлтийг Хүнс, хөдөө, аж ахуйн яам ямар ч үндэслэлгүй хэмээн тайлбарлаж байна. Салбарын яамны мэдээллээр Монгол Улс буудай, гурилын хомсдолд орохгүй. Нэг үгээр хэлбэл одоо ч, цаашид ч гурилын үнийг нэмэх ямар ч шалтгаан, үндэслэл байхгүй. Энэ жил ургацын тодорхой хувийг алдана. Гэхдээ Б.Эрдэнэбатын ярьж буй шиг 80 хувийг алдахгүй гэдгийг яамнаас хэлж буй.

Бодлогыг барьж буй яам иргэдийг ийн тайвшруулж байх хооронд гурилын үйлдвэрүүд ч үнээ нэмж, цаашид хэрхэн өсгөхөө ч тооцоолж буй. Үүнийг дагаад гурилны орцтой бүтээгдэхүүн бүрийн үнэ нэмэгдэнэ. Өргөн уудам нутаг, газрын хэвлий дэх баялаг, мал сүрэг хэдий их байна, тэр хэрээр уруудан доройтдог амьдралын хуультай монголчууд ч үнийн өсөлтөд хүлцэнгүйгээр дарлуулж байна.

В.Бат